Policia e Kosovës ka bërë të ditur se janë arrestuar 2 persona të dyshuar, pasi të njejtit dyshohen për grabitje dyshuar në rrugën “Tahir Zemaj” në Fushë Kosovë, përcjell InLajmi.
Lajmin për Gazetën Online InLajmi, e ka bërë të ditur zëdhënësja e policisë për rajonin e Prishtinës, Flora Ahmeti.
Të dyshuarit janë ndaluar për 48 orë, ndërsa në lidhje me rastin po bëhen hetime nga ana e policisë.
Njoftimi i plotë nga Policia e Kosovës:
Arrestohen 2 të dyshuar për grabitje
Prishtinë, 25 janar 2022 – Drejtoria Rajonale e Policisë së Prishtinës ka intensifikuar ndërmarrjen e masave policore, operative e hetimore për parandalimin dhe zbulimin e veprave penale si dhe goditjen e individëve dhe grupeve kriminale.
Fokus të veçantë ka marrë organizimi i punës policore për zbardhjen e veprave kriminale të grabitjes, identifikimi si dhe arrestimi i të dyshuarve të implikuar në veprat e tilla.
Progresi i hetimit policor për këto raste ka rezultuar me ndërmarrjen e një operacioni nga ana e stacionit policor të Fushë Kosovës, me ç’ rast, policia ka arrestuar 2 të dyshuar;
-A. D, mashkull, 24 vjeç, shtetas i Republikës së Kosovës, si dhe,
-B. H, mashkull, 18 vjeç, shtetas i Republikës së Kosovës,
për të cilët ekziston dyshimi i arsyeshëm se të njëjti kanë qenë të përfshirë në rastin e grabitjes së ndodhur në rrugën “Tahir Zemaj” në Fushë Kosovë, më datë 19.01.2022 rreth orës 12:30.
Ndaj të dyshuarve të arrestuar, me aktvendim të nxjerrë nga ana e prokurorit të shtetit, është shqiptuar masa e ndalimit policor prej 48 orësh, përderisa po vazhdon puna hetimore për zbardhjen e plotë të dyshimeve të ngritura për implikimin e këtyre të dyshuarve edhe në disa raste të tjera që po hetohen nga ana e policisë./InLajmi/
