Ministri i Shëndetësisë, Rifat Latifi, ka bërë të ditur se gjatë ditës së sotme ka vizituar 2 qytete të Kosovës atë të Prizrenit dhe të Gjakovës, përcjell InLajmi.
Vizitës së ministrit Latifi i është bashkangjitur zëvendëskryeministrja e Kosovës, Emilija Redžepi, ndërsa me kryetarët e komunave është biseduar për vaksinimin kundër virusit Covid-19.
Latifi ka kërkuar bashkëpunim nga qytetarët në mënyre që të vaksinohen se vetëm kështu mund të arrihet të mposhtët virusi, krejt kjo sipas tij duhet të bëhet për tu mbrojtur dhe të mos ketë mbyllje dhe kufizime.
Njoftimi i plotë i Ministrisë së Shëndetësisë:
Vetëm përmes vaksinimit mund të mbrojmë vetën, të afërmit tanë dhe të frenojmë valën e Omicronit.
Sot, Ministri Latifi bashkë me Zëvendëskryeministren Emilija Redžepi kanë vizituar Prizrenin dhe Gjakovën, ku takuan kryetarët e komunave, Totaj e Gjini, me të cilët biseduan për fushatën e vaksinimit kundër Covid-19 dhe rëndësinë e angazhimit të të gjithëve për ta shtyre këtë proces përpara.
Në Prizren e më pas edhe në Gjakovë, Ministri Latifi ka takuar anëtarë të komuniteteve jo shumicë, dhe në një diskutim të hapur folën për sfidat në qasjen në shërbimet shëndetësore, për rëndësinë e angazhimit të komunitetit në avokimin e vaksinimit, dhe në të njëjtën kohë kërkoi mbështetjen nga secili qytetar, të bisedojmë me të afërmit tanë që të vaksinohen sa më shpejt, për të mbrojtur kështu kujdesin shëndetësor nga mbingarkesa, ekonominë nga mbyllja dhe mirëqenien tonë sociale nga kufizimet.
Ministri Latifi i informoi ata se përkrah qendrave statike të vaksinimit, do të vazhdoj tutje vaksinimi mobil nga punonjësit e kujdesit shëndetësor dhe do të vizitohen zonat rurale dhe qytetarët që për shkaqe të ndryshme nuk mund të paraqiten në pikat aktuale të vaksinimit. Në këtë mënyrë, të lehtësojmë kuptimisht qasjen e qytetarëve në vaksina, në të gjithë territorin e Kosovës. /InLajmi/
