Ministri i Shëndetësisë në Maqedoninë e Veriut, Bekim Sali, e ka telefonuar ministrin e Shëndetësisë në Kosovë, Rifat Latifin, për të biseduar për vendimin e Qeverisë së Kosovës për masat e reja ndaj shtetasve të huaj, përcjell InLajmi.
Vendimi ka të bëjë me heqjen e masave për parandalimin e Covidit, me të cilën atyre që hyjnë nga jashtë në Kosovë, u kërkohen dëshmia se janë të vaksinuar me 3 doza të vaksinës kundër koronavirusit.
E duke u nisur nga kjo, ministri Sali ka shprehur shqetësimin e tij për këtë vendim dhe ka kërkuar nga Latifi, që ta rishqyrtojnë edhe njëherë këtë vendim dhe të krijojnë mundësi tjera, që të mbrohet shëndeti i qytetarëve.
Ministri i Shëndetësisë në Maqedoni e ka arsyetuar mendimin e tij për heqjen e këtij vendimi për shtetasit e huaj, duke theksuar se njësoj është gjendja edhe në Maqedoni, mirëpo ky vendim po i brengos dhe po i kufizon ndjeshëm të gjithë qytetarët e Maqedonisë së Veriut, që kanë lidhje familjare, biznesore e detyrime të tjera që i lidhin me Kosovën.
Postimi i plotë i tij:
Sot, kisha një bisedë telefonike me kolegun tim nga Kosova, ministrin e Shëndetësisë, Rifat Latifi, me ç’rast diskutuam për masat e reja të Qeverisë së Republikës së Kosovës ndaj të gjithëve shtetasve të huaj që hyjnë në këtë shtet.
Shprehа mirëkuptim për vendimin e qeverisë kosovare, që ka ardhur duke e pasur parasysh gjendjen epidemiologjike në shtetin fqinj, si dhe kapacitetet e tyre për përballjen me këtë valë të virusit.
Po ashtu, kolegut tim ia përcollа edhe brengën e qytetarëve të Maqedonisë së Veriut, që kanë lidhje familjare, biznesore e detyrime të tjera që i lidhin me Kosovën, e të cilët kjo masë i ka kufizuar ndjeshëm.
Duke konstatuar bashkërisht se gjendja me pandeminë në të dyja vendet është gati e njëjtë, kërkova nga homologu im, Latifi, që ta rishqyrtojnë këtë vendim dhe të kërkojnë një mundësi tjetër që edhe të mbrohet shëndeti i qytetarëve të të dyja vendeve, por edhe të mos pengohet qarkullimi i tyre i lirë. /InLajmi/
