Vazhdon kaosi në pikat kufitare me Kosovën. Të gjithë ata që nuk i kanë 3 doza vaksinash nuk lejohen të hynë në territorin kosovar.
Ka prej tyre që e kishin të domosdoshme të shkonin dhe përpos 2 dozave janë detyruar të bëjnë edhe teste PCR. Kjo masë e shtetit të Kosovës do të zgjasë 2 javë.
“Po na njoftuan dhe u kthyem bëmë teste se vetëm dy doza i kemi marr por jo edhe test PCR. U detyruat të bëni test, sa ju kushtuan? Testet nga 1.500 denarë. A është në rregull i gjithë ky shpenzim? Jo nuk është por s’kemi çfarë të bëjmë se ashtu e kanë marrë vendimin”, shprehet një qytetar.
Revolta e qytetarëve tanë të kthyer nga kufiri kosovarë është se përse të njëjtit nuk kërkojnë edhe 3 doza të vaksinave për shtetasit e tyre, të cilët hynë në territorin e vendit tonë pasi që të njëjtit vijnë bëjnë shopping, skijim apo edhe vizita familjare dhe në të kthyer bartin rrezikun potencial të përhapjes së virusit nga shteti ynë në shtetin e tyre.
“E gjithë bota po hapet! Së pari unë kam kaluar virusin dhe kam dy vaksian, çfarë do të më ndihmoj doza 3-të, asgjë! Bile të njoftonin ca ditë më herët, ja vijmë këtu na thonë nuk mundet, si jo! Çdo shtet normal do të zbatonte masat e reciprocitetit që duhet në këtë rast. Ata kërkojnë edhe ne duhet ta bëjmë”, thotë një qytetar.
Autoritetet e Kosovës thonë se nuk pritet ta rishikojnë këtë vendim deri më 4 shkurt kur dhe do të vlerësohet efekti epidemiologjik i masave. Sipas tyre këto masa janë marrë në mbrojtje të mospërhapjes së variantit Omicron, ku përveç kufizimeve në kufi kanë shtuar orën policore në gjithë vendin nga ora 22:00-05:00.
“Nga kjo masë lirohen shtetasit e Republikës së Kosovës që kanë dalë jashtë territorit në 12 orët e fundit dhe të njëjtit nëse kanë nga dy doza vaksinash në të kthyer në vendlindje nuk kanë nevojë për test PCR. Nëse të njëjtit vonohen më shumë se 12 orë jashtë Kosovës, në të kthyer duhet të mbahen 7 ditë në karantinë në kushte shtëpiake. Gjithashtu nga kjo masë lirohen shtetasit e huaj që tranzitojnë përmes territorit të Kosovës brenda tri orësh, si dhe personat nën moshën 12 vjeçare”, thonë për Alsat.M nga Qeveria e Republikës së Kosovës.
Për këtë vendim të Qeverisë së Kosovës kritika pati edhe nga shteti shqiptar ku ndërveprimet kufitare janë kushtëzuar për të gjithë. Të gjitha shtetet fqinje kritikojnë Kosovën se është vendi i vetëm në Evropë që po mbyllet në masa restiktive anti-kovid dhe orë policore, përkundër rekomandimeve të OBSH-së se tani që varianti omicron ka arritur pikun rreziku për vdekshmëri është i ulët dhe vendet duhet të nisin ngadalë të heqin masat kufizuese, madje edhe heqjen e maskave dhe certifikatave të vaksinimit.
