Avokati i Popullit, Naim Qelaj këtë të enjte ka vizituar OJQ “Handikos”, ndërsa nga afër ka dëgjuar dhe diskutuar për vështirësitë me të cilat ballafaqohen personat me aftësi të kufizuara, raporton InLajmi.
Avokati Qelaj ndër të tjera theksoi se ka shkuar në vizitë për të diskutuar për vitin 2022 që konsiderohet të jetë vit i personave me aftësi të Kufizuara.
“Edhe në aspektin global por edhe në Kosovë viti 2022 ka me qenë vit i personave me aftësi të kufizuara. Duke qenë në teren e kam parë gjendjen .Gjatë këtyre vizitave kam arrit t’i identifikoj problemet prezente”,tha avokati Qelaj.
Më tej, tha ai se shkaqet që ndikojnë në cenimin e të drejtave të personave me aftësi të kufizuara për të drejtat që i gëzojnë gjithë qytetarët, asnjëherë nuk duhet konsideruar si plotësim nevojash por realizim të drejtash.
“Në anën tjetër do të jemi pjesë e lobimit për fuqizimin dhe harmonizimin e krejt legjislacionit të Republikës së Kosovës. Por jo vetëm për qasje në objekte por në arsim e në krejt format e tjera që çdo qytetarë ka të drejtë. Pra duhet të ofrohen kushtet dhe mundësitë për me pas këtë qasje të pakufizuar”,tha tutje ai.
Ndryshe, ai tha se duke marrë informacionet e nevojshme në OJQ “Handikos” atëherë ai do të mund të dalë me konstatime dhe rekomandime se si duhet të zgjidhen problemet e personave me aftësi të kufizuara./InLajmi/
