Duke pasur parasysh gjendjen aktuale të pandemisë, Komuna e Prishtinës për fillimin e gjysmëvjetorit të 2 të shkollës, është duke bërë furnizimin me teste të shpejta antigjen përmes pështymës për Covid-19.
E njëra nga shkollat e furnizuara me këto teste, janë shkollat “Ahmet Gashi” dhe “Sami Frashëri”, në Prishtinë.
Ilmi Reçica, profesor në shkollën “Sami Frashëri”, ka thënë për Ekonomia Online, se 2 nxënës nga kjo shkollë janë konfirmuar me Covid-19, ndërsa të dyshuar janë edhe 4 profesorë.
“Kanë ardhur një numër i caktuar i testeve të shpejta, janë në dhomën e doktoreshës së shkollës. Janë diku 100 nxënës që kanë bërë teste dhe kanë dalë negativ. Brenda shkollës 2 nxënës janë krejt pozitiv mirëpo sot kemi pasur mungesë të 4 profesorëve, familjaret e të cilëve janë të infektuar nga Covid-19. Ka pas çrregullime të procesit mësimorë. Nëse duhet dhe është e nevojshme duhet edhe të mbyllen shkollat. Meqenëse mësimi online nuk ka qenë efektiv dhe mirëpo nëse duhet për çështjen e fëmijëve dhe mësimdhënësve duhet të vazhdohet me mësim online”,tha ai
Ndërsa drejtori i shkollës “Ahmet Gashi”, Haxhi Metaj në një intervistë për Ekonomia Online tha se në këtë shkollë kanë pranuar 3.000 teste, ku 1.400 nxënës janë testuar dhe asnjë nga këta nxënës nuk kanë rezultuar pozitiv.
Ndërsa tha po ashtu se nuk ka rezultuar asnjë mësimdhënës pozitiv, teka shtoi se të gjithë janë të vaksinuar.
“Neve na kanë ardhur diku 3.000 teste sepse ne jemi gjimnazi më i madh në komunën e Prishtinës, kemi rreth diku 1.400 nxënës dhe testet kanë ardhur dhe natyrisht se jemi duke bërë vlerësimin tek nxënësit, atyre që kanë probleme dhe mendojnë se kanë Covid-19. Deri sot janë lajmëruar diku 170 nxënës ku kemi bërë testet dhe nuk kemi pas raste pozitiv me testet që janë bërë”,tha ai.
Tutje, Metaj ka kërkuar që t’i sjellin më shumë teste. Në këtë shkollë janë 7 profesorë të dyshuar me Covid, teksa ka thënë se janë në pritje të rezultateve nga IKSHPK-ja.
“Ne po bëjmë përpjekje për respektim të masave deri diku respektohen por për shkak se edhe mosha e adoleshencës dhe gjitha këto janë që nuk është bash e thjeshtë. Momentalisht janë 7 raste aktive që na ka lajmëruar IKSHPK-ja sepse pa e konfirmu nga Instituti nuk japim përgjigje të sakta. Deri më sot nuk kemi raste tek mësimdhënësit sepse të gjithë janë të vaksinuar e po ashtu edhe punëtorët teknik dhe klasat e 12-ta mbi 70% janë të vaksinuar, por edhe të 11-tat dhe të 10-tat. Është një gjë shumë e mirë që janë të vaksinuar”,u shpreh ai.
