Bordit Gjeneral i RTK-së ka marrë vendimin për të shkarkuar nga detyra drejtorin e këtij bordi, Ngadhnjim Kastratin, përcjell InLajmi.
Drejtori i Bordit Gjeneral të RTK-së ka folur rreth këtij vendimi për shkarkimin e tij, ku edhe ka thënë se nuk ka qenë në dijeni për këtë vendim.
Madje ai njofton se lajmin për shkarkimin e tij e ka marrë gjersa ka qenë në shtëpi, qe sa ditë për shkak se kishte qenë pozitiv me Covid-19.
Ai pohon se prej se është zgjedhur në këtë pozitë, që nga viti 2019 e ka kryer me profesionalizëm dhe besueshmëri këtë punë, madje thekson se ka arritur të paguajë 4 milionë euro borxhe.
Kastrati thotë se që nga ardhja e Bordit të ri të qeverisë Kurti, është ballafaquar me shantazhe e presion të tyre për t’i larguar qindra punëtorë nga puna, në këmbim të vazhdimit të punës në këtë pozitë.
Postimi i plotë i tij:
Të dashur kolegë të RTK-së, miq e bashkëpunëtorë, sapo u njoftova se anëtarët e Bordit të RTK-së të emëruar javë më parë nga politika, kanë marrë vendim për shkarkimin tim nga pozita e drejtorit të Përgjithshëm në Radio Televizionin e Kosovës.
Njoftimin për shkarkim e morra në shtëpi, ku jam prej disa ditësh në izolim si rezultat i infektimit me Covid. Perveq tjerash une as nuk jam njoftuar per ndonje procedure te shkarkimit dhe as nuk ka pasur ne rend te dites pike per shkarkimin tim.
Që nga muaji prill i vitit 2019 kur jam zgjedhur në këtë pozitë, me krenari mburrem që e kam udhëhequr Mediumin Publik, duke ruajtur profesionalizmin dhe besueshmërinë publike.
Për këtë periudhë kam arritur që të paguaj mbi 4 milionë euro borxhe.
Që nga ardhja e anëtarëve të Bordit të ri të qeverisë Kurti, jam ballafaquar me shantazhe e presion të tyre për t’i larguar qindra punëtorë nga puna, në këmbim të vazhdimit të punës sime në këtë pozitë deri në fund të mandatit në prill 2022.
Por unë ju kam thënë qartë anëtarëve politik të këtij Bordi se unë nuk e largoj asnjë person nga puna. Arsyeja është e thjeshtë: Ata punojnë prej shumë vitesh dhe janë të nevojshëm, ndërsa me ato paga mbajnë familjet e tyre, e që është mjaft e vështirë ne këtë situatë të rëndë ekonomike.
Para disa ditësh, ky Bord, pavarësisht se kam qenë i sëmurë dhe në izolim, më ka kërkuar që t’ua dërgoj projeksionin buxhetor ku përfshihen edhe vendet e punës dhe ua kam dërguar të detajuara të gjitha dhe nuk kanë pasur asnjë vërejtje. Gjitha projeksionet buxhetore e programore ua kam dërguar pa e larguar asnjë punëtorë nga puna, edhe pse qeveria aktuale për këtë vit e ka zvogëluar buxhetin e RTK-së për më shumë se 2 milionë euro.
Mbetëshi mirë me shëndet! /InLajmi/
