Në shkollën fillore “Xhemail Mustafa”, në Prishtinë janë infektuar 30 nxënës me koronavirus dhe një mësimdhënës, shkruan InLajmi.
Drejtoresha e shkollës “Xhemail Mustafa”, Shpresa Shala në një prononcim për Gazetën InLajmi e ka konfirmuar këtë.
“30 nxënës dhe një mësimdhënës janë të infektuar për momentin. Kjo klasë automatikisht ka hyrë në mësim online, derisa në klasat e tjera ka nga 2- 3 nxënës të infektuar. Sipas task-forcës të shkollës tone është dhënë rekomandimi që mësimi në klasat e tjera të mbahet fizikisht”,tha drejtoresha Shala për InLajmin.
E pyetur se pas sa ditësh planifikohet që mësimi në këtë klasë që ka numër të madh të nxënësve të infektuar me koronavirus, të kthehet normalisht, Shala dha këtë përgjigje.
“7 ditë duhet të jenë të izoluar me rekomandim të Institutit të Shëndetit Publik të Kosovës”,tha më tej ajo.
Ndryshe, dje 2 shkolla kanë kaluar në online, për shkak të paraqitjes së rasteve me koronavirus, “Ismajl Qemajli” në Prishtinë, “Yll Morina” në Gjakovë, ndërsa nga MASHTI janë deklaruar se gjatë ditës së sotme do të dalin me informata më të reja, sa i përket kësaj çështje. /InLajmi/
