Kryetar i Aleancës për Ardhmërinë e Kosovës, Ramush Haradinaj ka komentuar paralajmërimin për shtrenjtimin e energjisë elektrike në Kosovë, duke e akuzuar qeverinë Kurti për mashtrim dhe shpenzim të mbi 100 milionë euro të taksave të qytetarëve për energji elektrike, përcjell InLajmi.
Ai thekson se qysh nga fillimi nuk ka besuar te kjo qeveri, mirëpo Haradinaj ju drejtohet atyre që e kanë votuar dhe e kanë besuar qeverinë Kurti, duke ju thënë se tani do të paguani nga xhepi i juaj për këtë shtrenjtim që po i bëhet energjisë elektrike.
Sipas tij, çmimi i energjisë nuk është ngritur 9%, por është rritur aq sa mafia nuk e ka pritur. Dhe ndarjen tarifore prej 600 kw e cilëson si mashtrim që nuk mbulohet.
Tutje Haradinaj thotë se qeveria Kurti pavarësisht se sa mburret, ajo po e godet mirëqenien e qytetarit në shifra teper të mëdha.
Postimi i plotë i tij:
Çmimi i mashtrimit
Që nga fillimi, kurrë nuk kemi pas asnjē dilemë që gjithçka për çka qëndroi VV dje, sot është mashtrim dhe demagogji në qeverisje.
Ata që nuk na besuan kësaj radhe do të paguajnë nga xhepi i tyre muajin e parë pas aplikimit të tarifave të reja.
Çmimi i energjisë nuk është ngrit me 9% por është rritë aq sa as mafia energjetike nuk e ka prit. Ndarja tarifore që nënkupton rritje minimale për shpenzuesit prej 600 kilovat është mashtrim që nuk mbulohet.
Rritja do të jetë shumë më e madhe për të gjithë që jetojnë në Kosovë kurse banesat dhe shtëpitë e zbrazta të diasporës tonë dhe mijëra apartamente të zbrazta nuk do të mjaftojnë që të maskojnë dëmin që do të ketë xhepi i qytetarit.
Ju qeveri e VV-së mbase mund edhe të mburreni se po reduktoni shpenzimet e administratës publike e bile edhe në kuvend ju mund të pini ujë nga ujësjellsi por ju po goditni në mirëqenien e qytetarit në shifra tepër të mëdha.
Jo veq 100 milion euro taksa të qytetarit por shumë më shumë keni shpenzuar për energji këtë gjysmë dimri sepse jeni të paaftë dhe prireni nga mashtrimi.
Për ju, jo substanca por pamja është primare.
Ky dhe dimrat tjerë do të jenë të gjatë, të errët dhe qe besa edhe të shtrenjtë për qytetarin e Kosovës dhe atë në shumë fusha, jo vetëm në energji. /InLajmi/
