Të paktën 26 persona kanë humbur jetën pas një tërmeti që goditi Afganistanin perëndimor, tha një zyrtar.
Viktimat vdiqën kur çatitë e shtëpive të tyre u shembën të hënën në distriktin Qadis në provincën perëndimore të Badghis, tha për agjencitë e lajmeve zëdhënësi i provincës Baz Mohammad Sarwary.
Tërmeti ishte me magnitudë 5.3, sipas Shërbimit Gjeologjik të SHBA-së.
“5 gra dhe 4 fëmijë janë në mesin e 26 personave të vrarë në tërmet”, tha Sarwary, duke shtuar se 4 persona të tjerë u plagosën.
Ai tha se shpëtimtarët e parë kanë mbërritur në disa nga zonat e prekura nën shi të dendur, por paralajmëroi se numri i viktimave mund të rritet pasi Badghis, në kufi me Turkmenistanin, është një provincë malore dhe një nga rajonet më të varfra dhe të pazhvilluara të Afganistanit, shkruan AlJazeera.
Një tërmet i 2-të, me magnitudë 4.9 ballë, goditi zonën 2 orë pas të parit, transmeton Klankosova.tv.
Mullah Janan Saeqe, kreu i Qendrës së Operacioneve Emergjente të Ministrisë së Shtetit për Çështjet Emergjente, konfirmoi numrin e të vdekurve dhe tha se më shumë se 700 shtëpi ishin dëmtuar.
