Kryetari i komunës së Prishtinës, Pëparim Rama ka njoftuar se shkollat e Prishtinës janë duke u furnizuar me teste të shpejta antigjen përmes pështymës për Covid-19, përcjell InLajmi.
Këto teste deri tani janë shpërndarë në 8 shkolla të Prishtinës, duke përfshirë instutucionet parashkollore, shkollat fillore dhe të mesme të larta.
Tutje Rama premton se testet antigjen do të vazhdojnë të shpërndahen edhe në zonat periferike të qytetit.
Këto teste të planifikuara për gjithë gjysmëvjetorin e 2-të do të shërbejnë gjatë gjithë kohës për testimin e nxënësve, që kanë simptoma si temperaturë, kollitje apo ethe ose që kanë pasur kontakt me persona të infektuar.
Postimi i plotë i tij:
Duke pasur parasysh gjendjen aktuale të pandemisë, Komuna e Prishtinës për fillimin e gjysmëvjetorit të dytë të shkollës, është duke bërë furnizimin me teste të shpejta antigjen përmes pështymës për Covid-19.
Shpërndarja e testeve ka filluar të bëhet nëpër institucione dhe gjatë pranimit të produktit ekipi i kontraktuar do t’u japë informatat e hollësishme dhe do të ofrojë trajnim rreth përdorimit të testeve antigjen.
Deri më tani testet antigjen janë shpërndarë nëpër tetë institucione parashkollore, shkolla fillore dhe të mesme të larta, kryesisht me numër të madh të nxënësve në zonat urbane. Në ditët në vijim mbetet të përfshihen edhe zonat periferike të kryeqytetit.
Është planifikuar që testet të shërbejnë gjatë gjithë gjysmëvjetorit të dytë. Do të testohen vetëm nxënësit që kanë këto simptoma:
-Temperaturë mbi normale
-Kollitje apo ethe
-Kontakt me persona të infektuar.
Ndarja e testeve është bërë në proporcion me numrin e nxënësve në institucione. /InLajmi/
