Dita e sotme në përkujtim të viktimave të masakrës së Reçakut i ka mbledhur krerë të shtetit ambasador dhe gjithë ata që ndihmuan Kosovën në rrugëtimin për liri e pavarësi, raporton InLajmi.
E pikërisht ambasadori amerikan në Kosovë, Jeff Hovenier në ceremoninë përkujtimore të 23-vjetorit të Masakrës së Reçakut, tha se mohimi i krimeve të luftës çnderon kujtimin e të vrarëve dhe se janë të vetëdijshëm për përpjekjet që të rishkruhet historia e dokumentuar mirë e Masakrës së Reçaku.
“Jemi të vetëdijshëm për përpjekjet për të rishkruar historinë e dokumentuar mirë të masakrës së Reçakut dhe për të minimizuar apo keqintepretuar faktet rreth këtyrë mizorive, dëshiroj të jem i qartë siç ka thënë presidenti Clinton atëherë dhe e vërtetojmë sërish tani ky ishte një akt vrasës i qëllimshëm dhe pa dallim, që synonte të mbillte frikë te populli i Kosovës, mohimi dhe glorifikimi i krimeve të luftës çnderon kujtimin e të vrarëve dhe e kthen rajonin prapa”, tha ai.
Hovenier tha se Masakra e Reçakut bëri që Aleatët si SHBA-ja dhe aleatët e NATO-s të intervenojnë në Kosovë.
“Askush të mos harrojë apo mohojë se çka ndodhi këtu dhe se pse aleatët dhe SHBA-ja intervenuan për të mbrojtur popullin e Kosovës. Në përgjigje të këtyre mizorive SHBA-të në bashkëpunim me aleatët e NATO-s vepruan në mbrojtje të civilëve të pambrojtur. Këto qëllime i përfaqësojnë thellësisht vlerat amerikane dhe perëndimore.Ne besojmë që të gjithë popujt pa dallim etnie apo feje meritojnë të jetojnë në liri”, tha ai./InLajmi/
