Shefi i Grupit Parlamentar të PDK-së, Abelard Tahiri, ka bërë të ditur se subjekti politik që ai përfaqëson nuk do të marrë pjesë në seancën e jashtëzakonshme të Qeverisë, thirrur nga kryeministri Albin Kurti, në lidhje me mbajtjen e referendumit serb në Kosovë, raporton InLajmi.
“Edhe pse kemi një qëndrim të Qeverisë, Qeveria dhe mazhoranca kanë bërë thirrje për mbajtjen e një seance të jashtëzakonshme për të shtruar këtë temë edhe për debat në Kuvend. PDK e sheh krejt të panevojshme thirrjen e kësja seance dhe nuk do të jemi pjesë e saj nesër”, deklaron ai.
Ndërkaq, kreu i kësaj partie, Memli Krasniqi, ka thënë se mbajtja e referendumit të Serbisë në Kosovë përbën një shkelje të sovranitetit dhe rendit kushtetues.
“Memli Krasniqi ka shprehur qëndrimin e qartë të PDK-së rreth çështjes së mbajtjes së referendumit të Serbisë brenda territorit të Kosovës. Mbajtja e referendumit të Serbisë në Kosovë përbën një shkelje të sovranitetit dhe rendit kushtetues. Do të donim që Qeveria të kishte pasur një koordinim më të mirë me shtetet e QUINT-it dhe veçmas me SHBA-të, pra në raport me këtë çështje. Fatkeqësisht, Qeveria ka vendosur të hesht”, potencoi më tej ai.
Siç është bërë e ditur nga kryeministria, në Kuvend është paraparë që të arrihet një rezolutë e përbashkët që kundërshton mbajtjen e referendumit të Serbisë përbrenda territorit të Kosovës./InLajmi/