Presioni ndaj Qeverisë së Kosovës për të lejuar organizimin e referendumit të Serbisë në Kosovë, po vazhdon të rritet, ndërsa reagime ka pasur nga të gjitha anët, përcjell InLajmi.
Nga Qeveria e Kosovës kanë deklaruar se e drejta e votimit nuk po i mohohet asnjë qytetari të Serbisë në Republikën e Kosovës, ndërsa ka njoftuar se janë 2 mundësi të lehta votimi për këta qytetarë, nëpërmjet postës dhe nëpërmjet Zyrës Ndërlidhëse të Serbisë në Republikën e Kosovës.
Lidhur me këtë çështje, krerët e shtetit Vjosa Osmani, kryekuvendari Glauk Konjufca dhe kryeministri i Kosovës Albin Kurti janë takuar këtë të premte me ambasadorët e QUINT-it ku temë diskutimi kanë pasur lejimin e organizimit të referendumit të Serbisë në territorin e Kosovës.
Lidhur me këtë çështje për Gazetën InLajmi, ka folur analisti Halil Matoshi, ku ka theksuar se Qeveria e Kosovës është në të drejtën e saj të mbrojtjes së sovranitetit.
“Qeveria e Kosovës është në të drejtën e saj të mbrojtjes së sovranitetit dhe integritetit të vendit, së këndejmi ky është pragu i fundit dhe i domosdoshëm. Nëse një vend tjetër përzihet në juridiksionin e një vendi sovran duke e instrumentalizuar një pakicë etnike, kjo ndërhyrje cilësohet si agresion në të drejtën ndërkombëtare”,ka thënë Matoshi.
Ndryshe, nga Ministria e Punëve të Jashtme sot kanë reaguar duke thënë se kërkesat e Serbisë janë të paarsyeshme dhe kanë për qëllim që të destabilizojnë gjendjen në veri të Kosovës dhe rajon/InLajmi/
