Kryeministri i Republikës së Kosovës, Albin Kurti, priti në takim Kampionin Absolut Mbarëkombëtar në Bodybuilding dhe Fitness, Marin Meksi, njëherit diplomat me përvojë në misione diplomatike të Republikës së Shqipërisë, përcjell InLajmi.
Kryeministri Kurti e përgëzoi Meksin për të arriturat e tij në karrierën sportive e diplomatike në afirmimin e kombit shqiptar. Në veçanti Kryeministri uroji për medaljen e artë të fituar në “IFBB Pro Diamond Cup” në kategorinë “Men’s Classic Bodybuilding up to 180cm”, garë e zhvilluar në muajin nëntor 2021 në Portugali.
Gjithashtu edhe Meksi e falënderoi Kryeministrin Kurti për këtë pritje, që pason dekorimin nga Presidenti Republikës së Shqipërisë me Urdhrin “Mjeshtër i Madh”.
Ai përgëzoi kryeministrin për punën, siç tha ai të jashtëzakonshme që po bën Qeveria e Republikës së Kosovës.
Gjatë takimit u bisedua për bashkëpunimin e shkëlqyeshëm dhe sukseset e përbashkëta të federatave të Bodybuilding dhe Fitness të Shqipërisë dhe Kosovës dhe angazhimit në promovimin e sportit.
Poashtu, Kryeministri Kurti shpalosi përkushtimin e qeverisë për zhvillimin e sportit në vend.
“Përveç përkushtimit për konsolidimin e rezultateve sportive në arenën ndërkombëtare, me theks të veçantë jemi duke punuar në zhvillimin e konceptit të sportit për të gjithë.Me dinamikën e jetesës në ditët e sotme, dhe zhvillimin e ndikimin e teknologjisë, sporti është aktiviteti përmes së cilës do të mundësojmë dhe sigurojmë zhvillimin e mirëqenies fizike, emocionale dhe mentale të shoqërisë tonë. Këtë synojmë ta bëjmë përmes ndërlidhjes së sportit me sistemin e arsimit në vendin tonë”, tha Kurti.
Në këtë takim të përbashkët morën pjesë edhe Arthur Bushati, Këshilltar në Ambasadën e Republikës së Shqipërisë në Prishtinë, Rando Kukeli, Sekretar i Përgjithshëm i Federatës së Bodybuilding të Republikës së Shqipërisë, Esat Lata, President i Federatës së Bodybuilding dhe Fitness të Kosovës, Sabri Dragusha, Sekretar i Përgjithshëm i Federatës së Bodybuilding dhe Fitness të Kosovës, Bedri Cahani, ish President i Federatës së Bodybuildingut të Kosovës dhe bashkëthemelues i Federatës së Shqipërisë si dhe Alban Hoti, bashkëpunëtor i Federatës së Bodybuilding dhe Fitness të Kosovës./InLajmi/
