Nënkryetari i Kuvendit të Kosovës nga radhët e PDK-së, Enver Hoxhaj, ka thënë se letra e sekretarit Anthony Blinken është një ftesë për një momentum të ri për Kosovës, përcjell InLajmi.
Hoxhaj ka shkruar se kjo letër ka për qëllim që dialogu Kosovë-Serbi të fokusohet në njohje të ndërsjellë.
Ai ka treguar se çfarë përmbanë letra e sekretarit Blinken duke theksuar se pritet të zbatohet në bashkëpunim të ngushtë me Ambasadorin Jeffrey Hovenier dhe të dërguarin e posaçëm Gabriel Escobar.
Postimi i plotë i tij:
Ftesa për një momentum të ri!
Letra e Sekretarit Antony Blinken është ftesë për një momentum të ri për Kosovën! Koha kur është dërguar kjo letër dhe me përmbajtjen e saj që kryesisht merret me temat e jashtme dhe dialogun Kosovë-Serbi, ka qëllim të qartë që dialogun ta fokusojë në njohje të ndërsjellë dhe gjithashtu lista e temave që janë përmendur, e bëjnë atë platformë të politikës së jashtme amerikane në 2022!
Në fillim të letrës të Sekretarit Blinken, tregohet agjenda e SHBA-së në raport me Kosovën dhe pritet që kjo të zbatohet në bashkëpunim të ngushtë me Ambasadorin Jeffrey Hovenier dhe të dërguarin e posaçëm Gabriel Escobar! Prandaj, duhet të merret shumë seriozisht!
Kjo është një mundësi e re, e veçantë për Kosovën gjatë administratës së Presidentit Biden. Nëse nuk shfrytëzohet, është shans i humbur!
Personalisht jam për shfrytëzimin e këtij momentumi – për të cilën partneri jonë kryesor strategjik SHBA është i vendosur të na mbështetë për ta përmbyllë shtetësinë tonë!/InLajmi/
