Presioni ndaj Qeverisë së Kosovës për të lejuar organizimin e referendumit të Serbisë në Kosovë, po vazhdon të rritet, përcjell InLajmi.
Reagime ka nga të gjitha anët, por nga Ministria e Punëve të Jashtë dhe Diasporës thonë se e drejta e votimit nuk po i mohohet asnjë qytetari të Serbisë në Republikën e Kosovës.
Zëvendësministri i Ministrisë së Punëve të Jashtme dhe Diasporës, Kreshnik Ahmeti tha se janë dhënë 2 mundësi të lehta votimi për këta qytetarë, nëpërmjet postës dhe nëpërmjet Zyrës Ndërlidhëse të Serbisë në Republikën e Kosovës.
“Por, kjo e drejtë nuk mund të manifestohet duke shkelur sovranitetin e vendit. Përderisa janë 2 mundësi të lehta votimi për këta qytetarë, nëpërmjet postës dhe nëpërmjet Zyrës Ndërlidhëse të Serbisë në Republikën e Kosovës, çfarëdo kërkese shtesë nga Serbia është vetëm preteks për destabilizim eventual të vendit e rajonit”,tha Ahmeti.
Kërkesat e Serbisë janë të paarsyeshme dhe kanë për qëllim që të destabilizojnë gjendjen në veri të Kosovës dhe rajon, tha më tej Ahmeti.
Postimi i plotë i tij:
E drejta e votimit nuk po i mohohet asnjë qytetari të Serbisë në Republikën e Kosovës. Por, kjo e drejtë nuk mund të manifestohet duke shkelur sovranitetin e vendit. Përderisa janë 2 mundësi të lehta votimi për këta qytetarë, nëpërmjet postës dhe nëpërmjet Zyrës Ndërlidhëse të Serbisë në Republikën e Kosovës, çfarëdo kërkese shtesë nga Serbia është vetëm preteks për destabilizim eventual të vendit e rajonit.
Si Republikë, jemi të barabartë mes fqinjëve tanë në rajon, prandaj duhet t’i shohim edhe praktikat e tyre në raport me pakicat serbe dhe me këtë proces votimi. Për më tepër, ne synojmë anëtarësimin në BE dhe duhet t’i shohim edhe praktikat e vendeve anëtare të cilat kanë pakica serbe.
Njohja e së drejtës së dikujt, nuk duhet të bëhet në kurriz të së drejtës së tjetrit. Prandaj, këto kërkesa të paarsyeshme të Serbisë nuk mund të legjitimohen nga praktikat e kaluara të cilat kanë shkelur sovranitetin e vendit. Serbia nëpërmjet këtyre kërkesave ka si synim vetëm legjitimin e destabilizimit eventual të veriut të Republikës së Kosovës dhe të rajonit./InLajmi/
