Komisioni Qendror i Zgjedhjeve (KQZ) ka mbajtur sot mbledhjen e parë për këtë vit, ndërsa ka miratuar raportin e Komitetit të Auditimit për vitin 2021, raporton InLajmi.
Në këtë mbledhje nuk u miratua kërkesa e Sami Kurteshit nga VV-ja që të dërgohet në Prokurori një pjesë e raportit që kishte të bënte me gjetjet për keqpërdorime me dezinfektues e dorëza gjatë zgjedhjeve.
“Ajo çka është konstatuar se ka pasur shkelje. Raporti është miratuar nga komuniteti dhe kam propozuar që ky raport të shkoj në institucione hetimore. Unë kam pritur që KQZ do t’i dërgojë në hetuesi. Dhe unë do ta dërgojë në hetuesi këtë raport. Ne duhet t’i japim fund që këtu të ketë shkelje. Këtu kemi dëmtim të shëndetit”, tha ai.
Kurse kryetari i KQZ, Kreshnik Radoniqi, tha se raportet janë publike dhe se Policia e Prokuroria mund që të ato t’i kërkojnë nga ky institucion.
“Me raportuar diçka në Polici është gjeja më e lehtë. Raportet janë publike mundet me ardhur në KQZ Policia e prokuroria”.
Ndërsa Florian Dushi nga Lidhja Demokratike e Kosovës (LDK) tha se janë konstatuar shkelje prandaj edhe duhet që të merren masa menjëherë, duke kërkuar që nëse është e nevojshme të dërgohen edhe në hetuesi.
Burim Ahmetaj, kryeshef i Sekretariatit të KQZ-së, tha se javën tjetër që të procedohet për votim buxheti dhe se raporti për zgjedhjet do të dërgohet në Kuvend në muajin prill./InLajmi/
