Ministri i Punëve të Brendshme i Kosovës, Xhelal Sveçla ka vizituar Bavarinë, e cila ndodhet në Republikën Federale të Gjermanisë, ku edhe e ka takuar homologun e tij, Joachim Herrmann, përcjell InLajmi.
Sveçla ka shprehur mirënjohje ndaj shtetit gjerman, ku bashkë me ministrin Herrman kanë biseduar për njohjen e patentë-shoferëve nga Gjermania, ku gjatë takimit u theksua se Kosova ndodhet në fazën finale të njohjes së patentë-shoferëve dhe se janë duke u bërë hapa konkret në këtë drejtim.
Gjithashtu gjatë takimit u diskutua edhe për prioritetet e tjera të Kosovës në luftën kundër krimit të organizuar, korrupsionit dhe për formimin e shtetit ligjor, si dhe zhvillimin social-ekonomik veçanërisht tani gjatë përballjes me pandeminë.
Ministri i Punëve të Brendshme i Kosovës, përmes një postimi në facebook ka treguar se së bashku me ministrin e Punëve të Brendshme të Bavarisë kanë biseduar për anëtarësimin e Kosovës në BE dhe Interpol, ku edhe ka theksuar rëndësinë e këtij anëtarësimi.
Gjatë takimit 2 ministrat premtuan edhe për bashkëpunim mes Policisë së Kosovës dhe Policisë së Bavarisë.
Postimi i plotë i tij:
Kisha nderin e madh që në Ministrinë e Brendshme të Bavarisë, në Republikën Federale të Gjermanisë, të pritem në takim nga homologu im Z. Joachim Herrmann.
Në këtë takim kam shprehur mirënjohjen tonë ndaj shtetit gjerman, që vazhdon të mbetet aleati ynë si në shtetndërtim ashtu edhe në ngritje të kapaciteteve tona. Biseduam për prioritetet tona në luftën ndaj krimit të organizuar, korrupsionit, forcimin e shtetit ligjor dhe zhvillimin socio-ekonomik veçanërisht tani gjatë përballjes me pandeminë Covid-19.
Liberalizimi i vizave për qytetarët tanë, anëtarësimi në Bashkimin Evropian dhe në Interpol janë synimet tona për të cilat e njoftova që jemi duke u angazhuar intensivisht për ti realizuar dhe që natyrisht kemi nevojë edhe për angazhimin dhe ndihmën e tyre. Diskutuam për thellimin e bashkëpunimit mes Policisë së Bavarisë dhe Policisë së Kosovës, bashkëpunimin në shkëmbim të informatave dhe zgjerim të bashkëpunimit bilateral të Ministrive tona, që padyshim do të lehtësojnë zbatimin e prioriteteve tona dhe për të gjitha këto kishte gatishmëri të plotë nga z. Herrmann.
Duke pasur parasysh që një numër jashtëzakonisht i madh i qytetarëve tanë jetojnë në zonën e Bavarisë dhe në gjithë Republikën e Gjermanisë, biseduam për politika konkrete që lehtësojnë jetën dhe angazhimet e tyre atje. Ne tanimë jemi në fazën finale të njohjes së patentshoferëve të Republikës së Kosovës nga Gjermania dhe këta janë hapat tanë konkret në këtë drejtim.
Pandemia Covid-19 ka vështirësuar takimet e udhëtimet tona por me dëshirën më të madhe kam ftuar z. Herrmann të vizitojë Republikën e Kosovës që ta njoftojmë nga afër me punën dhe arritjet tona. /InLajmi/
