Ish-nënkryetari i Organizatës së Veteranëve të Luftës, Nasim Haradinaj ka dëshmuar sot në seancën gjyqësore që po mbahet në Dhomat e Specializuara të Hagës, raporton InLajmi.
Gjatë marrjes në pyetje nga avokati i tij mbrojtës Toby Cadman, Haradinaj ka thënë se është kthyer nga Australia në momentin që e mori vesh se është sulmuar familja Haradinaj në Gllogjan të Deçanit.
“Legalisht unë hi në Kosovë si i armatosur më 1 janar 1998. Kthehem shkoj në Australi dhe atje e marr vesh se sulmohet fshati im, konkretisht kushëriri im, ose familja, Haradinaj, Ramush Haradinaj. Prej atje e kam ndërpre vizitën dhe jam kthyer në Kosovë me 1 prill ose 2 prill të vitit 1998 dhe kam ndejt aty derisa jam plagosur”, ka thënë ai.
Haradinaj ka folur për udhëheqjen e tij përgjatë luftës, ku theksoi se është plagosur e mjekuar në Kosovë e Shqipëri.
“E kam udhëhequr frontin e luftës përgjatë vijë Hereq-Baballaq-Prilep. Kam qenë aty. Kur jam plagosur ndihmën e parë e kam marrë në Kosovë, pastaj kam kaluar ilegalisht në Shqipëri. Jam mjekuar edhe aty. Pastaj kam shkuar në Suedi për 3 javë, jam kthyer dhe e kam vazhduar aktivitetin”, ka thënë ai.
Ai tha se bashkë me shokët e kanë krijuar ‘’Brigadën 138’’.
‘’ Më vonë me kontributet e mia dhe të shokëve të mi kemi arritur të krijojmë ‘Brigadën 138’ në koshare që është i vetmi vend ku merret kazerma ushtarake. Ajo në Koshare është specifike sepse kemi qenë në konsultim me oficerë amerikan dhe shqiptar dhe mendoj se serbët i dinë mirë pasojat e kësaj lufte dhe kësaj Brigade. Madje po xhirojnë film për këtë duke e quajtur xhehenemi ose ferri i Koshares”, ka thënë ai./InLajmi/