Mbi 5.100 persona janë arrestuar në Kazakistan lidhur me trazirat që kanë tronditur vendin javën e fundit, kanë thënë autoritetet e vendit të dielën.
Të arrestuarit do të merren në pyetje si pjesë e mbi 100 hetimeve të veçanta që lidhen me trazirat, sipas ministrisë së brendshme të këtij shteti.
Kazakistani, një vend i pasur me energji dhe me rreth 19 milionë banorë është përfshirë nga trazirat që u përhapën në qytete të ndryshme të vendit e ku u vranë dhjetëra persona duke përfshirë civil dhe forca të rendit.
Rritjet e çmimit të karburantit shkaktuan trazira një javë më parë në zonat provinciale perëndimore, por ato arritën shpejt në qytetet më të mëdha, duke përfshirë qendrën ekonomike Almati, ku shpërthyen trazirat dhe policia hapi zjarr duke përdorur plumba drejt protestueseve.
Mediat lokale në Kazakistan raportuan se deri më tani të paktën 13 zyrtarë të zbatimit të ligjit vdiqën në qytetin Almati dhe 353 persona u plagosën, por numri i protestuesve të vrarë në trazira ende nuk është i qartë.
Më shumë se 1.000 njerëz në rajone të ndryshme u plagosën si pasojë e trazirave, përcjell Euronews.al.
Prej tyre, pothuajse 400 u shtruan në spital, me 62 persona në kujdes intensiv, citohet të ketë thënë Ministria e Shëndetësisë së Kazakistanit.
