Kreu i AAK-së, Ramush Haradinaj ka komentuar aplikimin e 56.000 mijë qytetarëve për viza këtë muaj, të cilët po tentojnë të largohen nga vendi dhe për këtë ai e akuzon qeverinë Kurti, përcjell InLajmi.
Haradinaj tregon se arsyeja kyesore që qytetarët po largohen nga vendi është për shkak se qytetarëve u është vjedhur shpresa duke nisur nga qeveria, e cila nuk po tregon aftësi për ringjalljen ekonomike, por po e fundos ekonominë e Kosovës.
Ai thekson se Kurti po tenton që Kosovën ta kthejë në Venezuelë sepse me politikat majtiste ekstreme, ngjalljen e sentimentit anti-amerikan, sipas tij ata po shkojnë rrugës së Chavez-it
Tutje si faktorë që po e shkaktojnë këtë dukuri të migrimit të shumë qytetarëve, Haradinaj përmend reduktimet e energjisë, faturat e fyrera të energjisë pastaj thekson se qeveria nuk po e bën ligjin e pagave por luftën kundër sindikatave e sektorit privat.
Haradinaj shton se kjo qeveri po e lufton secilin që nuk mendon si kreu i saj, mirëpo kjo sipas tij do t’i kthehet, mirëpo atëherë nuk do të mund ta mbrojnë as militantët e tij të internetit.
Në fund Haradinaj thekson se ky largim i qytetarëve është një alarm për Kosovën dhe një fakt pikëllues dhe është tregues se kjo qeveri, nuk ka as vizion, as dije e as veprime qeverisëse
Postimi i plotë i tij:
A ka kryeministri ndonjë koment? 56000 qytetarë të Kosovës për një muaj kanë aplikuar për viza pune për të dalë jashtë vendi, vetëm në njërën nga ambasadat.
Përse kjo heshtje? A nuk ishit ju qeveria e shpresës? Përse kaq shumë qytetarë ia mësyejnë ta lëshojnë vendin?
Ata duan të ikin sepse qeveria nuk po tregon aftësi për ringjalljen ekonomike, përkundrazi, po e fundosë dita ditës edhe më shumë ekonominë edhe ashtu në krizë.
Qeveria e këtij Kryeministri, me politika të majta ekstreme, frikësoi kapitalin vendor duke e nxjerrë jashtë dhe duke u ulur shuma e investimeve. Ajo përpos se nuk e përkrahu, krijoi armiqësi me sektorin privat.
Qytetarët po ikin nga vendi sepse kjo qeveri e ky kryeministër po tentonjnë që Kosovën ta shndërrojnë në Venezuelë. Me politikat majtiste ekstreme, ngjalljen e sentimentit anti-amerikan, ata po shkojnë rrugës së Chavez-it.
Qytetarët po ikin sepse po ndëshkohen me reduktime të energjisë e fatura të fryra për energjinë që qeveria e blenë po me paratë e tyre, përderisa qytetarëve në veri të vendit, iu paguan dhjetëra milionë për energji. Ata refuzuan dhe shkatërruan mundësinë e artë, që Kosova të bëhet fuqi energjetike në rajon, duke refuzuar edhe Kosovën e re edhe gazin amerikan, veç për të blerë energji me çmime dhjetëfish më të larta nga mafia energjetike.
Kryeministër, qytetarëve u është vjedhur shpresa përmes tenderomanisë, tenderëve njëburimor, klientelizmit, politizimit të bordeve dhe punësimeve të familjarëve të funksionarëve të partisë suaj.
Qytetarë të profesioneve të ndryshme po duan ta lëshojnë vendin, sepse qeveria Kurti nuk e ka në agjendë ligjin e pagave por luftën kundër sindikatave.
Në fakt, kjo qeveri po e lufton secilin që nuk mendon si kreu i saj, por kjo do t’i kthehet bumerang dhe nuk do të mund ta shpëtojnë militantët imagjinarë të internetit.
Mbi 50 mijë qytetarë po tentojnë ta braktisin vendin. Ky është një fakt pikëllues, është një alarm për Kosovën. Është tregues se kjo qeveri, nuk ka as vizion, as dije e as veprime qeverisëse. /InLajmi/
