Për qeverinë australiane, infeksioni me Covid nuk është një arsye e mjaftueshme për të marrë përjashtimin mjekësor dhe Novak Djokovic nuk ka dhënë prova të mëtejshme të qarta për një kundërindikacion ndaj vaksinës.
Prandaj, tenisti serb nuk mund të hyjë në vend ose të marrë pjesë në Australian Open dhe pavarësisht nga vendimi i Gjykatës së thirrur për të vendosur mbi anulimin e vizës, zgjedhja për të mos lejuar që Djokovic të hyjë në Australi i takon Qeverisë.
Në prag të seancës së sotme, ky është qëndrimi i ekzekutivit australian.
Pak orë pas seancës për vlefshmërinë ose jo të certifikatës kundër Covid të lojtarit serb për të hyrë në Australi dhe për të marrë pjesë në Australian Open, gjykata e Melburnit ka publikuar përgjigjen që qeveria australiane do të sjellë në gjykatë, në të cilën qeveria dhe avokatët e Australian Open nënvizojnë faktin se serbi “nuk është i vaksinuar”.
Siç thuhet në pikën 64, nuk ka garanci për hyrjen e një shtetasi joaustralian në vend. Në të vërtetë, ekzistojnë kritere për hyrjen dhe arsyet pse viza mund të anulohet ose refuzohet, transmeton Gazeta Blic.
Ministri i Brendshëm ka fuqinë të verifikojë provat dhe të anulojë vizën e tij. Si përfundim, thuhet në dokument, kërkesa e Novak Djokovicit duhet të refuzohet.Kjo për shkak se “Australia, si një vend sovran, ruan diskrecionin më të madh se kë lejon të hyjë në vendin e saj”.
