Instituti Kombëtar I Shëndetit Publik të Kosovës dhe Ministria e Shëndetësisë kanë marrë vendim që të shkurtohet koha e izolimit për personat që rezultojnë pozitivë me COVID-19, nga 14 ditë sa ishte, në 10.
Ndërkaq atyre që testi i del 2 herë negativ, koha e izolimit u shkurtohet në 7 ditë. Sipas IKShPK-së këta persona në ditën e 6 ose të 7 mund të bëjnë testin për të parë nëse nuk rezultojnë pozitivë.
Personat të cilët kanë kontakt me dikë të infektuar, sipas IKSHPK-së nuk kanë nevojë të karantinohen nëse i përkasin moshës mbi 18 vjeç dhe janë vaksinuar me tri doza dhe as ata që janë të moshës 12-17 vjeç e që janë të imunizuar me 2 doza, shkruan Gazeta Blic.
Edhe ata persona që janë testuar pozitivë më shumë se 90 ditë më parë dhe janë të vaksinuar me të 2 dozat, nuk kanë nevojë për karantinim. Në këtë grup hyjnë edhe ata që brenda 90 ditët e fundit kanë kaluar COVID-in edhe nëse nuk janë të vaksinuar me asnjë dozë.
