Protesta e thirrur për ditën e sotme nga ish kryeministri i Shqipërisë, Sali Berisha po eskalon, duke tentuar protestuesit të hynë brenda në objektin e Partisë Demokratike (PD), përcjell InLajmi.
Me thirrjen “poshtë Basha”, protestuesit tashmë po thyejnë xhamat e selisë.
Lidhur me këtë është shprehur i shqetësuar, presidenti i Shqipërisë, Ilir Meta përmes një statusi në rrjetet sociale.
Meta ka bërë thirrje për ruajtjen e qetësisë, shmangien e akteve të dhunës, provokimeve dhe tensioneve të panevojshme, ndërsa ka ritheksuar faktin se duhet gjetur zgjidhja e menjëhershme demokratike që i shërben paqes.
Postimi i plotë i tij:
Duke ndjekur me shumë vëmendje dhe shqetësim zhvillimet në selinë e Partisë Demokratike, theksoj rëndësinë e protestës paqësore, si një e drejtë fondamentale në demokraci, plotësisht legjitime dhe kushtetuese, që duhet respektuar nga të gjithë!
Bëj thirrje për ruajtjen e qetësisë, shmangien e akteve të dhunës, provokimeve dhe tensioneve të panevojshme.
Është tepër e domosdoshme gjetja e një zgjidhjeje të menjëhershme demokratike, që i shërben paqes sociale dhe demokracisë në vend./InLajmi/
