Pjesa lindore e Shteteve të Bashkuara, nga Tennessee në New York, përballet me erë të fuqishme e reshje më të dendura të borës gjatë natës, me gjasë duke e shkaktuar ciklonin e parë “bombë” të sezonit dimëror të vitit 2022 në rajon, tha të enjten shërbimi për mot, “AccuWeather”.
Cikloni bombë është ngjarje intensive e motit në të cilën shtypja barometrike bie shpejt, duke shkaktuar reshje të dendura e erë të fuqishme.
Reshjet më të dendura priten në Maryland, Virginia, Karolinë Veriore e Tennessee, ndërsa në kryeqytet priten 7.5 centimetra borë.
“AccuWeather” tha se të premten në New York mund të ketë reshje me trashësi mbi 15 centimetra. Paralajmërimet për stuhi dimërore tashmë janë në fuqi në disa pjesë të bregdetit verilindor, sipas Shërbimit Kombëtar të Motit, shkruan Reuters.
“Sa më në veri që shkoni, aq më shumë grumbullim të borës”, tha shefi i meteorologëve në “AccuWeather”, Bernie Rayno, përcjell Gazeta Express.
Më herët këtë javë, një stuhi dimërore solli reshje të dendura të borës dhe erë të fuqishme në juglindje të Shteteve të Bashkuara, duke shkaktuar mbyllje të shkollave, ndërprerje të rrymës dhe anulim të fluturimeve.
