Oda e Hotelerisë dhe Turizmit të Kosovës (OHT), ka njoftuar se sezona po përfundon dhe Brezovica akoma nuk është funksionale, konkretisht teleferiku nuk është lëshuar në funksion, përcjell InLajmi.
Edhe pse Brezovica ka qendrën me të madhe për skijim, qytetarët ende nuk mund ta shfrytëzojnë teleferikun.
“Brezovica si çdoherë në stinën e dimrit vizitohet nga shumë turistë në këtë kohë, pasi që bora ju mundëson atyre që të skijojnë. Aktualisht Brezovica është qendra më e madhe në Kosovë për skijim dhe brenda stinës së dimrit ka shumë turistë. Por, për fat të keq adhuruesit e resortëve dimërore e të skijimit, nuk po munden ta shfrytëzojnë teleferikun në Brezovicë”,thuhet në reagimin e Odës së Hotelerisë dhe Turizmit të Kosovës.
Edhe pse është dashur të lëshohet që nga data 25 dhjetor 2021,kjo gjë ende nuk ka ndodhur.
“Për shkak që teleferiku në Brezovicë është një ndër atraksionet më të vizituara, sidomos tani me ardhjen e mërgimtarëve në Kosovë, dhe kjo që po ndodh është një humbje e madhe nëse nuk parandalohet menjëherë. Për këtë arsye shumë subjekte hoteliere e turistike janë ankuar sepse si pasojë e kësaj po anulohen shumë rezervime nëpër resortet e Brezovicës”,thuhet në këtë njoftim.
Tutje OHT flet për një tjetër ankesë e cila është prezente tash e disa ditë. Bëhet fjalë për pikën kufitare ‘’Jazhicë Glloboqicë’’ ku nuk po lejohen të hyjnë vizitorët nëse nuk e kanë dëshminë e 2 vaksinave, pra nuk po vlen as testi negativ PCR apo dëshmia se personi ka kaluar Covid-19.
“Oda e Hotelerisë dhe Turizmit të Kosovës kërkon që sa më parë të ketë ndërhyrje në këto 2 problematika që po shkaktojnë shumë humbje të bizneseve, sepse përveç se masat antiCovid e kanë rënduar gjendjen e bizneseve tej mase, kjo që po ndodh këto ditë që sezoni që duhen shfrytëzuar nuk duhet lejuar në asnjë mënyrë”,bëhet me dije nga Oda e Hotelerisë dhe Turizmit të Kosovës /InLajmi/
