Sekretari amerikan i Shtetit, Antony Blinken, bëri thirrje për zgjidhje paqësore të trazirave në Kazakistan.
Gjatë një bisede me homologun e tij kazak Mukhtar Tileuberdi, Blinken kërkoi që të ketë liri të medias.
Blinken “ritheksoi mbështetjen e plotë të Shteteve të Bashkuara për institucionet kushtetuese të Kazakistanit dhe për lirinë e medias dhe bëri thirrje për zgjidhje paqësore të krizës, duke respektuar të drejtat e njeriut”, tha Departamenti amerikan i Shtetit.
Blinken shkroi se ai zhvilloi një bisedë konstruktive me Tileuberdi.
Kjo bisedë mes 2 zyrtarëve erdhi në kohën e rritjes së dhunës në qytetin Almati të Kazakistanit, përcjell Euronews.al.
Në Kazakistan, për shkak të trazirave, një aleancë ushtarake e udhëhequr nga Rusia ka dërguar trupa për t’i ndihmuar autoritetet kazake që të shtypin protestat, të cilat janë më vdekjeprurëse në tre dekadat që prej se Kazakistani shpalli pavarësinë nga Bashkimi Sovjetik.
