Vëllai i personit që e vrau gruan dje në Llaushë të Skenderajt po thotë se dorasi ka probleme psikike. Ai tha se kunata e tij ka qenë një grua e mirë dhe e ndershme, teksa fajtorë për raportin familjar e lë vëllain e tij.
Azem Qerimi tha se ndihen shumë keq pas këtij rasti teksa kanë shprehur keqardhje edhe për familjen e gruas së vrarë.
Ai tregoi edhe se si rasti në polici është lajmëruar 2-3 ditë para kësaj ngjarje.
“Lajmin e kemi marrë shumë të vështirë dhe shumë vështirë e kemi besuar. Nuk kemi besu se e bënë vëllai im atë. Vëllai im ka qenë një njeri i papunë, tre fëmijë, skamje dhe kohëve të fundit ka pasur edhe kriza. Fëmija e vet me shoqen e kanë lajmëruar policinë. Ata kanë shkuar atje dhe Policia i kanë mbajtur për 5 orë. Është fjala për 2-3 ditë më herët. Në fund i kanë lëshuar të gjithë së bashku. Unë jam habitur me atë veprim të policisë, me e lëshu njeriun që ka tentu me mbytë bashkëshorten e tij 2-3 herë”, ka thënë vëllai i dorasit para mediave.
Fjalë të mira ai pati për kunatën e tij që dje u vra nga burri, shkruan Gazeta Express.
“Më obligoj mua që të shkojë t’i blejë do sene që mem largu nga shtëpia edhe ashtu e morëm lajmin prej vëllezërve. Kur erdha në shtëpi e pashë që e kishte bërë atë akt shumë të ligë. Na vjen shumë keq prej familjes së të vrarës, kunatës sime. Ajo ka qenë një grua shumë e sinqertë. Ka qenë një femër e përkryer , e ndershme por vëllai im ka pasur probleme psikike dhe ato e kanë detyruar që ta bëjë atë akt”, ka thënë ai.
