Policia e Kosovës ka vazhduar aksion në rastin “Brezovica”, sot në Ministrinë e Mjedisit, Planifikimit Hapësinor dhe Infrastrukturës, raporton InLajmi.
Pas këtij aksioni Prokuroria Themelore në Ferizaj, ka mbajtur një konferencë për medie.
Prokurori, Rasim Maloku i emëruar në këtë çështje ka thënë se kanë ngrirë 6 milionë euro.
“Nga të dhënat financiare që i kemi siguruar nga bankat që i posedojnë këta të pandehur dhe familjarët e tyre, deri tani kemi ngrirë afër 6 milionë euro. Shumica e këtyre mjeteve janë të vetë të pandehurve, kurse një pjesë e tyre janë të familjarëve të tyre që dyshohet se janë mjete të përfituara si dobi pasurore nga veprat penale”, tha Maloku.
Maloku gjithashtu ka bërë të ditur se se në këtë aksion janë sekuestruar një veturë BMË, armë, kompjuterë, video kaseta, uniformë me mbishkrimin e ish sistemit jugosllav, USB, dokumente, etj.
“Operacioni ka rezultuar me 4 persona të arrestuar. Një prej tyre është lejuar. 5 persona të tjerë janë në kërkim policor”, tha ai.
Ai gjithashtu ka thënë se sa i përket rastit të kaluar të sekuestrimit, rezultatet e hetimeve janë ngrirje të pasurive dhe janë në proces të identifikimit të villave në Brezovicë.
“Kemi prit edhe aksionin e sotëm që me i përfshi bashkë. Janë konfiskuar, dokumente për leje mjedisore, aktvendime për lëshimin e lejeve. Sa i përket hidrocentraleve nuk janë objekt i trajtimit të kësaj çështje”, ka thënë ai.
Tutje prokurori Maloku ka thënë për ish-sekretarin e Ambientit dhe Planifikimit Hapësinor, Arben Çitakun tha se po dyshohet për keqpërdorim të detyrës zyrtare dhe marrje të ryshfetit.
Nga ana tjetër zyrtari policor, Agron Haziri tha se në aksionin e sotëm u arrestuan 4 persona. Njëri prej tyre tha se është liruar, ndërsa tha se janë në kërkim edhe të 5 personave tjerë.
“Operacioni ka rezultuar me 4 persona të arrestuar. Një person i dyshuar është liruar në procedurë të rregullt. 3 persona të tjerë janë ndaluar për 48 orë me vendim të prokurorit dhe 5 persona janë në kërkim policor”, tha Haziri. /InLajmi/
