Ministrja e Ekonomisë, Artane Rizvanolli, ka bërë të ditur se pas themelimit të Komitetit Teknik për “Masat e emergjencës në furnizimin e energjisë”, nga Qeveria e Kosovës, nga krijimi e deri më tash janë zhvilluar 2 takime, përcjell InLajmi.
Sipas Rizvanollit këto takime janë mbajtur për të identifikuar problemin dhe për të rekomanduar zbatim të masave si dhe të trajtohen efektet negative të rrethanave që janë krijuar si pasojë e krizës energjetike në botë.
“Institucionet e rendit do të ndalojnë prodhimin e kriptovalutave me mbështetje të të gjitha institucioneve relevante të cilat do të identifikojnë lokacionet e prodhimit”,tha ajo.
Postimi i plotë i saj:
Në fund të vitit të kaluar me vendim të Qeverisë së Republikës së Kosovës kemi themeluar Komitetin Teknik për “Masat e emergjencës në furnizimin e energjisë”. Ky Komitet Teknik ka mbajtur 2 takime për të identifikuar dhe rekomanduar zbatimin e masave për t’i trajtuar efektet negative të rrethanave të krijuara nga kriza energjetike botërore.
Duke u bazuar në rekomandimet e këtij Komiteti Teknik, javën e kaluar kam marrë vendimin për Masa të Emergjencës përmes të cilit ndalohet prodhimi i kriptovalutave në të gjithë territorin e Republikës së Kosovës.
Institucionet e rendit do të ndalojnë prodhimin e aktivitetit në fjalë me mbështetje të të gjitha institucioneve relevante të cilat do të identifikojnë lokacionet e prodhimit të kriptovalutave.
Këto obligime kanë për qëllim trajtimin e çfarëdo mungese të papritur ose afatgjatë të kapacitetit prodhues energjetik, kapacitetit të transmetimit apo të shpërndarjes së energjisë në mënyrë që të tejkalojmë krizën e energjisë pa rënduar më tej qytetarët e Republikës së Kosovës. /InLajmi/
