Princi Charles ka lavdëruar djalin e tij, më konkretisht princin Harry dhe është shprehur krenar me të, në lidhje me punën pasionante për ndryshimet klimatike, që ai kishte bërë, transmeton InLajmi.
Princi Charles i ofroi një degë ulliri princit Harry mbrëmë, duke lavdëruar punën pasionante të djalit të tij për të theksuar dhe trajtuar ndryshimet klimatike.
Marrëdhëniet midis Charles dhe Harry-t thuhej se më herët ishin në nivelin më të ulët të të gjitha kohërave, pasi Harry dhe gruaja e tij Meghan u larguan nga familja mbretërore dhe u transferuan në SHBA.
Trashëgimtari i fronit tha se ishte krenar që të 2 djemtë e tij e kishin njohur kërcënimin me të cilin përballet planeti dhe përgëzoi përkushtimin e tyre për kauzat e gjelbra.
Lavdërimi i tij specifik për Harry-n do të shihet si një përpjekje për të shëruar një përçarje, pasi burimet thanë se dyshja mezi kishin folur për muaj të tërë, shkruan Daily Mail.
“Si baba, jam krenar që djemtë e mi e kanë njohur këtë kërcënim. Së fundmi, djali im i madh, William, lançoi çmimin prestigjioz “Earthshot” për të nxitur ndryshimin dhe për të ndihmuar në riparimin e planetit tonë gjatë 10- viteve të ardhshme”, ka thënë princi Charles.
Në lidhje me Harry-n, ai shtoi: “Djali im më i vogël, Harry, ka theksuar me pasion ndikimin e ndryshimeve klimatike, veçanërisht në lidhje me Afrikën, dhe e angazhoi bamirësinë e tij”. /InLajmi/
