Maqedonia e Veriut të martën ka regjistruar 1.197 raste të reja me koronavirusin e ri dhe 15 të vdekur, shifër kjo më e lartë në 8 muajt e fundit.
Sipas raportit të Ministrisë së Shëndetësisë në Maqedoninë e Veriut, viktimat janë 4 në Shkup, 3 në Manastir, nga 2 në Ohër dhe Vallandovë, ndërsa nga një në Prilep, Veles, Gjevgjeli dhe Negotinë.
Numër më i madh i të të infektuarve është regjistruar në Shkup, gjithsej 766 raste të reja.
Të dhënat e bazohen në testimin e 7.483 mostrave në laboratorët shtetëror dhe privat të Maqedonisë së Veriut.
Instituti i Shëndetit Publik bëri të ditur se me shifrat e ditës së martë, numri i rasteve aktive është rritur në 5.667 persona nga 227.000 persona të diagnostikuar me COVID-19 që nga paraqitja e pandemisë. Deri më tani jetën e kanë humbur 7.996 veta.
Drejtuesit e institucioneve shëndetësore gjendjen epidemiologjike e kanë vlerësuar stabile përkundër rritjes së rasteve në 2 ditët e fundit.
Ministria e Shëndetësisë edhe të martën ka bërë thirrje për zbatimin e masave kundër pandemisë, tani në prag të festave të Krishtlindjeve Ortodokse. Veç kësaj, dikasteri i shëndetësisë ka apeluar për vaksinim, që mbetet në nivele të ulëta, transmeton Radio Evropa e Lirë.
Në Maqedoninë e Veriut aktualisht me nga 2 doza është vaksinuar rreth 39% e popullsisë, apo mbi 810.000 persona.
