Këngëtarja e njohur Violeta Kajtazi e cila për vite me radhë ka sjellë këngë të bukura në një intervistë për Gazetën InLajmi, ka treguar se a do ta ndërrojë zhanrin në të cilin ka kënduar për vite me radhë, a mendon se do ta ketë jetën e gjatë zhanri i muzikës popullore sipas saj, cila është formula e pozitivitetit që ajo e përcjell gjithmonë tek të tjerët, sa ka ndikuar në shëndet dhe financa pandemia.
Për këto dhe pyetje të tjera përgjigjet mund t’i kuptoni në intervistën në vazhdim.
Gazeta InLajmi: Që nga fillimi i karrierës suaj keni kënduar këngë popullore. A ju ka shkuar mendja ndonjëherë ta ndërroni zhanrin?
Violeta Kajtazi: Në fillimet e mija, kam kënduar folklor dhe kam ekzekutuar në çifteli por edhe gjithmonë këngën popullore!
Gazeta InLajmi: A mendoni se do të mundet edhe për një kohë të gjatë t’i mbijetojë muzika popullore modernizimit?
Violeta Kajtazi: Muzika popullore i ka mbijetuar edhe kohërave më të vështira. Unë mendoj se sa të ketë shqiptarë mbi tokë muzika popullore do të jetojë, sepse është burim edhe i këngëve të modernizimit!
Gazeta InLajmi: A ju ka mbetur merak të këndoni në një zhanër tjetër?
Violeta Kajtazi: Jo nuk më ka mbetur merak të këndoj në zhanre të tjera edhe pse i dëgjoj e i dua shumë. Por, kohëve të fundit kam pas këngën time, muzikë të lehtë, baladë!
Gazeta InLajmi: Jeni shumë pozitive dhe e buzëqeshur. Cila është formula e kësaj?
Violeta Kajtazi: Faleminderit Zotit dhe gjeneve nga familja që jemi pozitiv dhe me dozë të humorit.
Gazeta InLajmi: Si i keni raportet me kolegët e estradës. Po ju pyes për këtë sepse ka shumë raste kur nuk flasin në mes vete, nuk i gëzohen sukseseve të njëri- tjetrit?
Violeta Kajtazi: Raportet e mia me kolegë i dinë të gjithë! Prej se merrem me muzikë, i kam raportet e mira me të gjithë. Nuk është raport falco, sepse fytyra e vërtetë del një ditë, e unë kam miqësi të gjatë me të gjithë.
Gazeta InLajmi: Pandemia, sa ndikoi në shëndetin, financat, karrierën e juaj?
Violeta Kajtazi: Pandemia, jemi munduar ta kalojmë pa panik, fatmirësisht e kemi kaluar familjarisht pa pasoja të mëdha, me financa ia kemi dalë edhe me ndihmën e familjes që e kamë në gurbet!
Gazeta InLajmi: Në fund të vitit 2021 keni lansuar këngën më të re “Për ty arritje” sikurse edhe një duet me Ganimete Abazin dhe Pro Band. Si kanë shkuar këto projekte?
Violeta Kajtazi: Ua kemi për borgj atyre që na duan që t’ju sjellim këngë të reja! Uroj që t’ju pëlqejnë të gjithëve këngët që ne i sjellim.
Pasi që kam sjellë këngë për fundvit, atëherë mendoj që për vitin 2022 të sjellim këngë të reja, por se kur do të ndodhë kjo do të njoftohen patjetër fansat që e duan muzikën time.
Gazeta InLajmi: Çka prisni nga viti 2022?
Violeta Kajtazi: Çka presë të ndryshoj në vitin 2022. Të kemi shëndetin së pari, të kemi vullnetin për me ecë përpara, atëherë ndryshimi për të mirë vjen vet!
Gazeta InLajmi: Duke ju falënderuar për kohën që ndatë për ne, cila kish me qenë porosia për lexuesit e Gazetës InLajmi, fansat që e duan muzikën e juaj?
Violeta Kajtazi: Të gjithë lexuesve të Gazetës InLajmi dhe të gjithë atyre që e duan muzikën time, ju uroj shëndet dhe gjithë të mirat familjarisht!
Ju dua shumë të gjithëve!
Lindita Canolli-Fejzullahi/InLajmi/
