Me 7 dhjetor të vitit 2021 kryetari i Komunës së Prishtinës, Përparim Rama ka marrë zyrtarisht detyrën e të parit të Prishtinës, derisa ende nuk e ka bë publike asnjë emër të drejtorëve, gjegjësisht nuk ka vendosur drejtor në dikasteret komunale, shkruan InLajmi.
Por së fundmi, Rama ka njoftuar se do të shtoj numrin e drejtorive në Komunën e Prishtinës.
Lidhja Demokratike e Kosovës (LDK), kandidoi Ramën për kreun e Prishtinës në zgjedhjet e fundit komunale ka arritur t’i merr vetëm 14 asamblistë në Kuvendin Komunal të Prishtinës, derisa Lëvizja Vetëvendosje 17 asamblistë, 9 Partia Demokratike e Kosovës (PDK), 6 Aleanca për Ardhmërinë e Kosovës (AAK), një Lëvizja për Bashkim, një Nisma Socialdemokrate.
E kryetari i Prishtinës, Rama, pati folur gjatë fushatës zgjedhore se anëtarët e Komunës së Prishtinës do të jenë përtej bindjeve politike, gjegjësisht profesionistë të fushave.
Por edhe përkundër kësaj Rama ende nuk ka dalë me asnjë emër për drejtorët dhe ekzekutivin, ani pse u përfol se LDK është afër koalicionit me PDK-në, dhe më vonë me AKR-në, por asgjë deri më tash nuk u tha zyrtarisht.
Gazeta InLajmi për disa ditë me radhë ka pritur të marrë një përgjigje lidhur me këtë çështje nga zyrtarë përgjegjës të Komunës së Prishtinës, por kjo e fundit është deklaruar se pyetjet e gazetës për këtë temë “janë në proces”.
Por kjo vonesë, gjegjësisht mos dalja me emrat e drejtorëve dhe ekzekutivit, sipas asamblistëve nga partitë opozitare në Kuvendin Komunal të Prishtinës është i pa arsyeshëm.
Asamblisti i AKR-së në Prishtinë, Sami Boroci, thotë se është e rëndësishme të konstitohet Kuvendi sa më parë.
“Nuk mendoj se Prishtina ka kohë me hupë pa e krijuar qeverisjen qoftë në Kuvend, qoftë t’i emërtoj drejtorët. Kjo zvarritje mendoj se është humbje kohe për Prishtinën. Besoj se në fillim, gjegjësisht javën e parë të janarit dhe jo më shumë duhet të konstituohet Kuvendi”,tha Boroci për Gazetën InLajmi.
I pyetur lidhur me bisedimet e AKR-së dhe kryetarit Rama lidhur me koalicionin, Boroci ka dhënë këtë përgjigje për Gazetën InLajmi.
“Kryetari Rama është duke tentuar të bënë koalicione dhe mendoj se negociatat janë duke zgjatë. AKR-ja ka pasur takime, por asgjë konkrete sa e di unë nuk ka. AKR nuk po e lë pengë askënd. Pra, ka pasur një diskutim por nuk ka qenë shumë konkret”,tha ai.
Por për krejt këtë zvarritje nga ana e Komunës së Prishtinës, Boroci mendon se po ndodhë për shkak se nuk ka qëndrueshmëri në Kuvend.
Leotrim Retkoceri nga Partia Demokratike e Kosovës (PDK) për Gazetën InLajmi ka njoftuar se “lajmet se Blerand Stavileci “do të bëhet nënkryetar” i Komunës së Prishtinës janë demantuar, derisa ajo që mund të thuhet sipas tij është se kanë pasur takime.
“S’mund të flas më shumë për qëndrimet që kanë qenë në atë takim”,tha shkurt Retkoceri.
Ai ritheksoi se më së largu deri më 7 janar, duhet të zgjidhet kryesuesi i Kuvendit Komunal të Prishtinës dhe të dilet me propozimet për ekzekutiv.
E asamblisti i Kuvendit Komunal të Prishtinës nga radhët e Lëvizjes Vetëvendosje, Berat Lahu tha se kryetari Rama qysh moti, pra në fushatën elektorale pati deklaruar se e ka ekipin për qeverisje, por kjo siç tha ai nuk po qëndron.
“Në fakt është e kuptueshme që kur nuk ke shumicën duhet të zhvillosh negociata dhe këto mund të marrin kohë. Mirëpo kryeqyteti dhe qytetarët kanë tepër shumë nevojë për punë e angazhim të udhëheqjes.Mendoj që kryetari Rama duhet të intensifikoj shumë përpjekjet e tij për të gjetur partnerë për të udhëhequr me Prishtinën në mënyrë që mos të humbet kohë e vlefshme”, bëri me dije Lahu për Gazetën InLajmi.
Tutje, tha ai Lëvizja Vetëvendosje vazhdimisht është shprehur se është e gatshme të punoj dhe ndihmoj çdo gjë që është në të mirë të qytetarëve.
“Kjo vlen edhe për Prishtinën. Asnjëherë nuk jemi deklaruar kundër ndonjë bashkëpunimi të mundshëm”,tha tutje ai.
Në anën tjetër asamblisti nga radhët e partisë NISMA Socialdemokrate, Endrit Zabërgja, tha për InLajmi se shpreson se kjo zvarritje të arsyetohet nëse emërimi i kabinetit të kryetarit Rama do të ndërlidhet me fushat përkatëse programore.
“Do të varet nga rezultati, a do të arsyetohet kjo zvarritje me kualitetin e programit që do ta prezantojë Rama. Besoj se nëse do të ketë energji pozitive, kryetari i ri Rama e ka mundësinë e artë për të prodhuar një politikë me standard të ri, duke mishëruar programet politike nga të cilat ka mjaft kualitet e që janë prezantuar në fushatën e fundit politike”,ka thënë Zabërgja./InLajmi/
