Qeveria e Republikës së Kosovës, ka mbajtur sot mbledhjen e fundit të vitit 2021, raporton InLajmi.
Kjo ishte mbledhja e 53-të e saj, që këtë herë u mbajtë në formë elektronike, dhe miratoi në të 2 vendime.
Në radhë të parë më kërkesë të Ministrisë së Ekonomisë dhe me propozim të Ministrisë së Financave, Qeveria ka miratuar vendimin për ndarjen e mjeteve buxhetore në shumë prej 10.860.000 euro për zbatimin e Pakos së Ringjalljes Ekonomike për masën 4.6, Mbështetja e Ndërmarrjeve Publike.
Ndërsa në radhë të 2-të, u miratua vendimi për shfuqizimin e pjesshëm të Vendimit të Qeverisë Nr. 17/20, të datës 24 mars 2015, për kërkesën e deklarimit dhe ekzekutimit të dividendës nga Ndërmarrja Publike “Posta dhe Telekomunikacioni i Kosovës Sh. A. (PTK), dhe në këtë rast vlera e dividendës së kërkuar zbritet nga 30.000.000 euro në 15.000.000 euro. /InLajmi/
