Albulena Haxhiu, ministre e Drejtësisë në Kosovë ka mbajtur konferencë për media ku ka thënë se sot se raportet me Këshillin Prokurorial të Kosovës nuk janë edhe aq të këqija, raporton InLajmi.
Gjatë kësaj konference ministrja Haxhiu ka thënë se me KPK-në më shumë ka pasur përplasje verbale për çështjen e vetingut në sistemin e drejtësisë.
“Sa i përket raporteve me KPK-në konsiderojë që nuk janë ashtu siç duken. Ka pasur disa acarime më shumë verbale dhe në këtë drejtim konsideroj që arsyet për këtë janë reformat në drejtësi që ka nisur MD-ja. Besoj që edhe njerëzit e mirë që janë brenda sistemit të drejtësisë që ka shumë të tillë që kanë integritet moral dhe profesional e kanë në interes që të bëhen reformat në drejtësi”, tha ajo.
Ministrja Haxhiu gjithashtu ka thënë se është e hapur për bashkëpunim, teksa shtoi se KPK-ja konsideron se nuk duhet të ketë veting në drejtësi.
“Besoj që këto reforma nuk duhet që të jenë pengesë për sistemin e drejtësisë. Unë jam shumë e hapur që të kem bashkëpunime me ta. Mosprania e tyre në grupe punuese që lidhen me vetingun ata konsiderojnë që nuk duhet të ketë veting por për këtë kanë vendosur qytetarët e Kosovës”, ka thënë ajo. /InLajmi/
