Presidentja e Kosovës, Vjosa Osmani, ka folur rreth “Ditës së Veteranit të UÇK-së”, ku ka thënë se kjo ditë i dedikohet të gjithë atyre që në momentet më të vështira e mbrojtën atdheun, përcjell InLajmi.
Osmani ka thënë se sot i nderojmë të gjithë ata veteranë, të cilët nuk hezituan, por rezistuan, nuk ngurruan, por luftuan dhe nuk u zmbrapsën, por i dhanë shtytje lirisë sonë.
Ajo ka rikujtuar se në këtë datë, 3 dekada më parë, Adem Jashari me familjen kanë nisur rezistencën në përballje me forcat serbe, e cila shpiu në rënien e tij bashkë me familjen.
Tutje ajo ka thënë se përulet para të gjithë atyre veteranëve, të cilët atëherë e sot, atdheun e kanë mbi të gjitha.
Postimi i plotë i saj:
Fundviti përkon edhe me Ditën e Veteranit të UÇK-së, e cila i dedikohet njerëzve që patën guximin që në momentet më të vështira, atdheut t`i bëhen mbrojtës, por edhe të jenë lajmëtarë të lirisë. Sot nderojmë të gjithë ata veteranë, të cilët nuk hezituan, por rezistuan, nuk ngurruan, por luftuan dhe nuk u zmbrapsën, por i dhanë shtytje lirisë sonë. Kjo datë bie në të njëjtën ditë kur 3 dekada më parë, më 30 dhjetor 1991, komandanti legjendar Adem Jashari me familje nisi rezistencën në një përballje direkte me forcat e regjimit gjenocidal serb, duke shënuar kësisoj fillet e rezistencës ushtarake të ushtrisë, së cilës i priu deri në rënien e tij bashkë me familje.
Përulem para të gjithë atyre veteranëve, të cilët atëherë e sot, atdheun e kanë mbi të gjitha! /InLajmi/
