Deputetja e Lidhjes Demokratike të Kosovës, Hykmete Bajrami ka thënë se nuk ka informacione për ekspertin gjerman i cili do të inspektojë dhe riparojë dëmet e krijuara në bllokun B-2.
Për angazhimin e ekipit të ekspertëve nga Gjermania tashmë janë ndarë rreth 250 mijë euro.
Bajrami e ftuar në emisionin Frontal në T7 ka thënë se KEK-u është dashur t’i ketë ekspertët e vetë për inspektime e riparime të tilla.
“Ne e kemi këtë institucion në menaxhim që 20 vite pas luftës. KEK-u që sa ekziston është dashur t’i ketë ekspertët e vetë. Mirëpo, një ekspertizë e formës së tillë natyrisht se është e kushtueshme”, ka theksuar ajo.
Tutje, Bajrami është shprehur se KEK-u momentalisht është duke importuar energji elektrike me çmim shumë të shtrenjtë, ndërsa është duke ja shitur atë KEDS-it me çmim të lirë.
“20 milionë euro veçse i ka nda Qeveria e Republikës së Kosovës që është duke e importu KEK-u për momentin energjinë elektrike, të cilën po e importon me çmim shumë të shtrenjtë dhe po ja shet KEDS’it me çmimin e lirë, nëse nuk gaboj është 31 euro për kilovat”, ka shtuar ajo.
