Termi “globalizim” lidhet me përhapjen e kapitalizmit të tregut të lirë dhe me zhvillimin e ekonomive pa kufij, që është ideja e një mjedisi tregtar global, shkruan InLajmi.
Megjithatë, në kontekstin sociologjik, globalizimi nuk është thjesht dukuri ekonomike, por edhe kulturore e shoqërore.
Në diskutimet e shumta mes tyre, teoricienët kulturorë kanë trajtuar çështjen nëse globalizmi do të thotë detyrimisht se bota do të bëhet homogjene, duke lëvizur drejt një kulture “botërore” apo reagimet ndaj forcave të globalizimit, do të rivendosin larminë gjuhësore, kulturore dhe përkatësitë etnike.
Shoqëri të ndryshme bashkë me diasporën, i përvetësojnë produktet e modernizmit në mënyra të ndryshme.
Imagjinata njerëzore është thelbi për të kuptuar globalizmin. Individët e konceptojnë globalizmin në 5 përmasa jo të ngurta.
Mënyra se si përceptohen këto përmasa nga individët, grupet dhe shtetet është çështje këndvështrimi.
Te këto përmasa përfshihen financa, teknologjia, idetë, media dhe lëvizja e njerëzve.
Antropologu social dhe sociologu indian, Arxhun Apadurai, ka thënë se pikëpamja tradicionale mbi globalizmin, si një formë e imperializmit kulturor, nuk arrin të pasqyrojë realitetin e ndryshimeve që ka sjellë globalizmi.
Apadurai ka mendimin se shoqëri të ndryshme i përvetësojnë konceptet dhe produktet e modernizimit në mënyra të ndryshme. Kjo do të thotë se shoqëri si Kina mund të marrë shumë shpejt një aspekt të ndryshimit global (ndryshimin ekonomik, bie fjala), ndërsa një aspekt tjetër (për shembull, ndryshimin ideologjik), shumë ngadalë, kurse një shoqëri tjetër mund të ndodhë krejt ndryshe. /InLajmi/
Burimi: Libri i Sociologjisë
