2 diga u thyen të dielën në Brazilin verilindor, duke kërcënuar përmbytje më të mëdha në një rajon të përmbytur nga shirat që tashmë ka detyruar që mijëra njerëz të largohen nga shtëpitë e tyre.
Qeveritë e qytetit të Jussiape dhe Itambe postuan paralajmërime në mediat sociale duke u kërkuar njerëzve të kërkojnë siguri.
“Një digë me një vëllim të madh uji është thyer dhe një përmbytje e fortë pritet të prekë brenda pak çastesh edhe bashkinë Itambe. Të gjithë banorët të evakuohen urgjentisht nga brigjet e lumit Verruga”, thuhet në mesazhin e qytetit të postuar në Instagram.
Zyra e shtypit e qeverisë së shtetit Bahia tha se shirat e dendur kanë shkaktuar përmbytje që kanë vrarë 18 njerëz dhe kanë prekur 72 qytete që nga fillimi i nëntorit, duke detyruar më shumë se katër mijë banorë të largohen nga shtëpitë e tyre dhe duke komplikuar aksesin në disa komunitete.
“Në këtë moment të parë ne po veprojmë për të shpëtuar njerëzit, për t’i larguar njerëzit nga maja e shtëpive të tyre, nga izolimi, me varka”, tha guvernatori i Bahia Rui Costa gjatë një vizite në një zonë të prekur të dielën, transmeton Klan Kosova.
Ai tha se zyrtarët po përpiqeshin të shpërndanin ushqim, dyshekë dhe veshje të ngrohta.
