I pari i PSD-së Dardan Molliqaj ka reaguar lidhur me deklaratat e zëdhënësit të KEDS-it, Viktor Buzhala, përcjell InLajmi.
Buzhala së fundmi në një konferencë për medie tha se vendi aktualisht është duke u përballur me vështirësi bukur të mëdha sa i përket furnizimit me energji elektrike. Ndërsa në bazë të analizave që janë bërë tha ai, janë 3 faktorë që ndikojnë në këtë gjendje siç është rritja e madhe e konsumit të energjisë elektrike në vend, pamjaftueshmëria e prodhimit dhe kriza ndërkombëtare që ka rritur çmimet
I pyetur lidhur me akuzat e kryetarit të PSD-së, disa orë më parë ku tha se KEDS është shkaktare për këtë krizë, Buzhala u deklarua se për këtë janë duke u marrë zyra ligjore.
E lidhur me këtë i është kundërpërgjigjur Molliqaj përmes një postimi në rrjetet sociale.
“Reagimi i Buzhalës, vetëm sa shton dyshimin. Në vend se menaxhmenti i ri KEK-ut dhe KEDS-it të jenë transparente, t’i lënë vend hetimit, si dhe organet hetuese të drejtësisë të nisin punën një orë e më parë, kanë zgjedhur sulmin. KEDS është e mbyllur ndaj qytetarit prej të cilit përfiton milionat. Duke kërcënuar në konferencë dhe duke i ruajtur objektet e KEDS me polici, nuk mund ta pengojnë e as të heshtin kundërshtimin qytetar”,tha Molliqaj.
Postimi i plotë i tij:
Sot, pas konferencës që PSD ka mbajtur, lidhur me kolapsimin e KEDS, përmes pyetjeve dhe dyshimeve të ngritura, siç duket ka prekur thelbin e disa e problemeve të grumbulluara në këtë kompani dhe relacionin e saj me Qeverinë.
Reagimi i z. Buzhala, vetëm sa shton dyshimin. Në vend se menaxhmenti i ri KEK-ut dhe KEDS-it të jenë transparente, t’i lënë vend hetimit, si dhe organet hetuese të drejtësisë të nisin punën një orë e më parë, kanë zgjedhur sulmin.
KEDS është e mbyllur ndaj qytetarit prej të cilit përfiton milionat. Duke kërcënuar në konferencë dhe duke i ruajtur objektet e KEDS me polici, nuk mund ta pengojnë e as heshtin kundërshtimin qytetar.
Stili i SLAPP padive që kanë për qëllim kërcënimin e atyre që ngrisin zërin kundër eksploatimit nuk mund të zgjas. Efektit publik dhe menaxhimit te imazhit po i vie fundi.
Kjo qasje vetëm sa na jep të drejtë. Aksionet dhe organizimi do të rriten. Padrejtësia nuk mund të normalizohet. Terri ndonjëherë ndriçon të vertetën./InLajmi/