Kriza energjetike, ka bërë që të ndërmerren kufizime të energjisë rreth 2 orë për të gjithë konsumatorët.
KEDS-i ka bërë të ditur se qytetarët mund të informohen përmes llogarisë personale në eKesco, për orarin e reduktimeve.
Jo të gjithë qytetarë kanë llogari në eKesco, pasi shumë nga ta banojnë në banesa me qera, apo kanë me qera puntori.
Çdo konsumatorë po afektohët (së paku) nga 2 orë në ditë.
Qytetaret kanë kërkuar që të dinë orarin se kur do t’u ndalët rryma.
“Po ndalet edhe më gjatë se 2 orë në ditë. Duhet të dimë orarin se kur ndalët, në mënyrë që të jemi të përgatitur, dhe jo të në zë terri në banjo, në lift a ku ta di. Orarin e ndaljeve duhet ta publikojnë në ueb faqen e tyre”, thotë Kushtrim Misini, qytetar nga Lakrishta, i cili thotë se rryma i është ndalur mbrëmë nga ora 21:00 deri në 23:00.
Edhe Gent Bugiqi që banon në kryeqytet, thotë se e rrugës do të ishte që KEDS-i të njoftojë drejt për orarin e reduktimeve, pasi që do të ishte më e lehtë të planifikohej dita edhe në kuptimin e përgatitjes së drekës, darkës, po ashtu edhe pastrimit, pasi në reduktime të tilla është e vështirë të ngrohet uji.
“Në një rast kur qytetarët do të dinin saktë orarin e rrymës, ata do të mund të menaxhonin më mirë me orët në dispozicion. Kjo është më e pakta që KEDS-i do të mund të bënte në këtë kohë të vështirë’, thotë ai për lajmi.net.
KEDS-i ka bërë të ditur se kufizimet e planifikuara me energji elektrike do të vazhdojnë edhe gjatë ditëve në vijim.
Përmes një njoftimi me shkrim, KEDS-i bën të ditur se reduktimet do të vazhdojnë deri të merren instruksione tjera nga KOSTT-i.
“Duke qenë se kriza energjetike tashmë është thelluar në vendin tonë, dhe nga ana tjetër faktorë të tjerë, sikurse mbingarkesat e sistemit elektro-energjetik dhe trendi i rritjes së shpejtë të konsumit, kanë bërë që kufizimet e planifikuara me energji elektrike për të gjithë konsumatorët të vazhdojnë edhe në ditët në vijim, deri sa të marrim instruksione tjera nga KOSTT”, thuhet në njoftim.
Në njoftim bëhet e ditur se ndalesat do të vazhdojnë të jenë rreth 2 orë, në periudha të ndryshme të ditës.
“Këto ndalesa sipas planit do të vazhdojnë të jenë rreth 2 orë për secilin grup të konsumatorëve, në periudha të ndryshme të ditës. Dukuri që po pengon kyçjen me kohë të grupeve të caktuara, janë ngarkesat e mëdha që po shfaqen në dalje gjatë këtij procesi. Për të eliminuar këtë dukuri, kërkohet bashkëpunimi i të gjithëve. Konsumatorët të cilët janë pa energji elektrike, sipas planit të kufizimeve duhet që pajisjet elektrike mundësisht t’i kenë të shkyçura apo të larguara nga priza, në mënyrë që procesi i rikyçjes të secilës dalje të realizohet në mënyrë të suksesshme”, thuhet në njoftim.
