Komiteti Teknik i Ekspertëve deklaroi të enjten se varianti Omicron i COVID-19 ka mbërritur në Shqipëri.
Deri tani janë konfirmuar 2 raste në vendin tonë, pasi mostrat u dërguan në Gjermani.
Pavarësisht pranisë së variantit të ri, masat shtrënguese nuk do të ndryshojnë, përveç orës policore që do të hiqet natën e ndërrimit të viteve.
Sipas kryetares së Komitetit, Mira Rakacolli gjendja është e qëndrueshme, ndërkohë që në Shqipëri mbizotëron varianti Delta.
Në një kohë kur varianti i ri është prezent anëtarët e Komitetit Teknik të Ekspertëve bëjnë thirrje që qytetarët të vaksinohen dhe të zbatojnë me rigorozitet masat anti-COVID.
Rakacolli solli në vëmendje që masat nuk po zbatohen në nivelin e kërkuar, përcjell Euronews.
Kujtojmë se në 24 orët e fundit në vendin tonë janë regjistruar 343 raste të reja me COVID-19 dhe 2 viktima.
