Këshilli për Mbrojtjen e Drejtave dhe Lirive të Njeriut (KMDLNJ), ka reaguar pas fyerjeve që iu bënë Bajram Çerkinit nga “Shoqata e Familjarëve të Personave të Pagjetur”, ku kanë kërkuar hetime lidhur me rastin, përcjell InLajmi.
Në reagimin e KMDLNJ-së thuhet së angazhimi i Bajram Çerkinit është i sinqertë dhe i njëjti mundohet në zbardhjen e fatit të të pagjeturve pavarësisht përkatësisë nacionale, racës, gjinisë dhe statusit në shoqëri.
“Angazhimi i Bajram Çerkinit është angazhim i sinqertë që buron nga solidariteti për zbardhjen e fatit të personave të pagjetur pavarësisht përkatësisë nacionale, racës, gjinisë dhe statusit në shoqëri. Bajram Çerkini dhe familja e tij sikur edhe të gjitha familjet që kanë anëtarët e tyre në listën e të pagjeturve nuk kanë asnjë çast gëzimi në jetë, të vetmin gëzim e kanë sigurimin e informatave për fatin e më të dashurve të tyre e që është edhe e drejtë elementare e njeriut që duhet të mbrohet dhe sigurohet nga shteti” thuhet në njoftimin e KMDLNJ-së.
Tutje është thënë se nuk është aspak njerëzore ti drejtohesh në mënyre “çka huptë mos u gjetë’ dikujt që është direkt i lidhur me rastin Çerkini ka djalin e zhdukur.
“Të shkruani se ‘çka huptë mos u gjetë’, në rastin konkret për djalin e Bajram Çerkinit dhe fyerje tjera që nuk kanë të bëjnë me natyrën njerëzore, është përbuzje për vuajtjet dhe sakrificat e familjeve të të pagjeturve dhe të gjithë atyre që u sakrifikuan për një shtet ku liria e fjalës dhe liria e shprehjes paraqet vlerë themelore mbi të cilën ndërtohen të gjitha vlerat tjera”,thuhet në njoftim.
Këshilli për Mbrojtje ka kërkuar nga Policia e Kosovës të nis hetimet lidhur me rastin e këtyre komenteve siç i kanë quajtur ata të ulëta .
“KMDLNJ kërkon nga Policia e Kosovës të nis hetimet për këto komente të ulëta dhe është i sigurt që Njësia për Hetime të Krimeve Kibernetike ka kapacitet të mjaftueshëm profesional ta bëjë këtë. Përdorimi i gjuhës së urrejtjes sanksionohet si vepër penale dhe në asnjë mënyrë nuk mund të arsyetohet me lirinë e fjalës dhe lirinë e shprehjes”,është theksuar nga Këshilli. /InLajmi/
