I pari i Qeverisë së Kosovës, Albin Kurti gjatë fushatës në zgjedhjet e 6 tetorit pati premtuar se do t’ua lehtësonte jetën çifteve të reja, duke ua mundësuar blerjen e banesës me këste brenda 10 vitesh, shkruan InLajmi.
Tutje Kurti pati thënë se do të ndërtohen 4.000 banesa në Prishtinë dhe përreth saj, ku çiftet e reja mund të paguanin nga 150 euro në muaj.
E së fundmi nga Qeveria e Kosovës kanë thënë se në bashkëpunim me Korporatën Financiare Ndërkombëtare janë duke u analizuar opsionet më të favorshme për zhvillimin e projektit, por se nuk dihet se kur do të realizohet saktësisht kjo.
Ky projekt nëse realizohet është i mirëseardhur, thotë profesori universitar, Milazim Krasniqi në një prononcim për Gazetën InLajmi.
“Premtim i mirë. Uroj të realizohet pasi politika të ngjajshme përdoren në shumë vende për ta ndalë trendin e ikjes nga vendi”, tha profesori Krasniqi.
Tutje, Krasniqi tha se ky projekt nuk është lehtë i realizueshëm, por shpreson se do të realizohet pasi që është në interes të vendit.
“Nuk është lehtë i realizueshëm, por nëse qeveria e ka seriozisht, shpresoj se mund të gjejë mjete dhe mënyra që ta realizojë. Do të ishte në interes të vendit tonë”,ritheksoi ai./InLajmi/
