Roja bregdetare e Greqisë ka thënë se një emigrant ka vdekur dhe dhjetëra të tjerë mendohet se janë zhdukur pas përmbytjes së një barke afër ishullit Folegandros.
Trupi i një burri të paidentifikuar u nxor gjatë operacionit të kërkim-shpëtimit herët të mërkurën, pasi barka u përmbyt rreth 180 kilometra në juglindje të Athinës.
Roja bregdetare tha se 12 persona, të cilët besohet se janë nga Iraku, janë shpëtuar dhe janë dërguar në ishullin Santorini.
Shumica e të mbijetuarve thanë se fillimisht ishin 32 persona në barkë, por njëri u tha autoriteteve se në barkë ishin rreth 50 njerëz.
Roja bregdetare tha se 4 barka, 2 helikopterë të forcave ajrore e detare, një aeroplan ushtarak i transportit, 5 anije dhe 3 barka private janë duke marrë pjesë në operacionin e kërkim-shpëtimit, shkruan Associated Press.
Roja bregdetare tha se operacioni filloi të martën në mbrëmje, pasi mori informacione se një barkë me emigrantë ka pësuar prishje të motorit dhe më vonë i është futur uji në jug të ishullit Folegandros, transmeton Gazeta Express.
Greqia është njëra ndër rrugët kryesore drejt Evropës Perëndimore për njerëzit që kanë ikur nga varfëria e konfliktet në Azi, Lindje të Mesme e Afrikë. Shumica e përpjekjeve të emigrantëve për të arritur në këtë shtet bëhen përmes barkave nga bregdeti turk.
