Varianti i Covid-19, Omicron i cili është përhapur me të madhe në krejt botën, qysh muaj më parë, shumë shpejt mund të përhapet me të madhe edhe në vendin tonë, sidomos tash kur jemi në prag të festave të fundvitit, shkruan InLajmi.
Kështu ka thënë në një prononcim për Gazetën InLajmi, ish drejtori i Klinikës së Infektivës, infektologu, Hamdi Ramadani.
“Që nga muaji nëntor ka nisur me shpejtësi të përhapet varianti Omicron, variant ky i vërtetuar edhe nga OBSH. Ky variant thuhet se po përhapet shpejte tek njëri- tjetri, pra është shumë ngjitës, derisa ajo që duhet theksuar është se po sulmon edhe ata persona që e kanë marrë edhe dozën e 2 të vaksinës, po sulmohen nga ky variant. Në krejt botën, por edhe në vendin tonë ditë më parë ka nisur të jepet doza e 3 e vaksinës anti-Covid. Krejt kjo në mënyrë që të krijohet imunitet dhe t’i rezistohet më lehtë Omicronit”,bëri me dije për Gazetën InLajmi, infektologu Ramadani.
Tutje, Ramadani tha se mendohet se varianti Omicron do të ketë një “shpërthim” ditët në vijim, sidomos për faktin se veç ka nisur mërgata jonë të vie në Kosovë për të festuar festat e fundvitit.
“Në vendin tonë fatmirësisht këto ditë ka pasur pak raste, por mundësia është shumë e madhe për shkak të numrit të madh të bashkatdhetarëve, në aspektin mjekësor edhe shkencor paralajmërohet për një rritje të madhe të Omicronit gjatë këtyre ditëve festive. Po e ritheksoj se as me 2 doza të vaksinës nuk jemi të mbrojtur nga ky variant. Pra Omicron i ka 2 të këqija më të theksuara se të tjerat variante, është më ngjitës se varianti Delta dhe po infektohen edhe ata që kanë marrë 2 doza të vaksinës kundër koronavirusit. E vetmja mundësi është që të marrim dozën e 3, e cila mund ta zbusë deri në maksimum sepse nëse merren 3 dozat atëherë mbrojtja imunologjike kalon 90% derisa ajo që u pa deri më tash është se 2 dozat nuk po na mbrojnë nga Omicron”, tha tutje Ramadani, derisa theksoi se në botë ka pasur raste edhe me fatalitet nga ky variant.
Infektologu Ramadani mendon se duke e ditur se Covid-19 ka diku 32 mutacione, kjo pandemi do të vazhdojë edhe në vitin 2022, bile edhe me variante të tjera, përveç Omicronit.
“Apeli im po e ritheksoj është, vaksionohuni edhe me dozën e 3 në mënyrë që të rrisim imunitetin dhe virusin ta mbajmë nën kontrollë. Mendoj se është çështje e kohës që të vaksinohen edhe fëmijët e moshës 6-11 vjet, sepse duhet të bëhet edhe mbrojtja e fëmijëve ndaj virusit, sepse edhe kjo moshë po sulmohet në theks të veçantë nga Omicron, sikurse edhe moshat e shtyra. Këtë praktikë ka kohë që e kanë nisur vendet e botës”,tha tutje, Ramadani.
Këto ditë në vendin tonë po bëhet thirrje që të lirohen masat anti-Covid, në mënyrë që t’i presim në mënyrën më të mirë bashkatdhetarët, e lidhur me këtë, Ramadani ka këtë përgjigje.
“Shumë vende të botës janë duke bërë shtrëngime, pra sa i përket masave kufizuese. Po të bëhet zbutje apo lirim i masave sidomos në këtë kohë kur jemi në prag të festave të fundvitit nuk mendoj se është e lejueshme, bile është gabim profesional i cili pastaj do të lë pasoja. Bëj apel që sikurse nga fillimi të vazhdohet të respektohen masat anti-Covid, distancë dhe mbi të gjitha të bëhet vaksinimi, imunizimi i qytetarëve me dozën e 3”,tha Ramadani./InLajmi/
