Projektet e investitorëve të huaj në Kosovë, pa dyshim që ndihmojnë në zhvillimin ekonomik të një vendi.
Sipas njohësit të çështjeve ekonomike, Safet Gërxhaliu, është shumë e rëndësishme që Kosova t’u hapë rrugën dhe t’u japë hapësirë më shumë investimeve të huaja në energji të ripërtëritshme.
Në një diskutim për pakon e ringjalljes ekonomike të organizuar nga INDEP, ish-kryetari i Odës Ekonomike të Kosovës, tha se është koha kur burokracia institucionale të eliminohet dhe të jemi sa më të vëmendshëm.
“Besoj që është koha kur duhet të eliminohet burokracia institucionale, t’i hapet mundësia e investimeve të huaja në energji të ripërtëritshme dhe në këtë drejtim duhet të jemi vigjilent”, deklaroi ai.
Sipas tij në krahasim me Kosovën, vendet e rajonit janë shumë agresive në tërheqjen e investitorëve të huaj qoftë në energji apo edhe në teknologji.
Ai gjithashtu potencoi edhe një rast konkret ku një investitori të energjisë së erës, për 3 vjet e gjysmë nuk i është dhënë licenca për investimin në Kosovë ne vlerë prej 110 milionë eurosh.
“E kemi rastin ku i njëjti investitor në energji të erës pret tre vjet e gjysmë për një licencë për të filluar investimet ne vlerë prej 110 milion eurosh dhe në ndërkohë nga Maqedonia për një muaj e merr licencën dhe e nënshkruan kontratën për 240 milionë euro dhe 244 megavat energji elektrike nga panela solarë”, shtoi Gërxhaliu.
Ish-kryetari i Odës Ekonomike të Kosovës konsideron se ka ardhur koha që të ndërmerren hapa konkretë në çështjen e ambientalizmit.
“Është koha kur Kosova duhet të ofrojë alternativa dhe fizibilitet të arsyeshëm, çka dëshiron dhe çka do të jetë prioritet. Nuk mbrohet ambientalizmi vetëm duke mbështetur organizatat të ndryshme joqeveritare, nuk mbrohet ambientalizmi vetëm në takime dhe konferenca por duhen hapa konkretë në këtë drejtim”, deklaroi njohësi i çështjeve ekonomike Gërxhaliu, përcjell Gazeta Infokus.
Krejt kjo u tha në një diskutim të mbështetur nga “Balkan Trust for Democracy”, projekt i German Marshall Fund of the United States dhe USAID e i zbatuar në Kosovë nga Instituti për Politika Zhvillimore – INDEP.
