21 dhjetor 1840– Në Tekirdag, provincë osmane në brigjet e Marmarasë, Turqi e sotme, erdhi në jetë poeti, përkthyesi, gazetari, reformatori dhe botuesi turk, Namik Kemal. Ai mori famë ndërkombëtare veçanërisht me pjesën teatrale “Atdheu ose Silistra” (Vatan Yahut Silistre), në vitin 1872.
21 dhjetor 1937– “Borëbardha dhe shtatë xhuxhët”, filmi vizatimor i parë me metrazh të gjatë, me zë dhe me ngjyra, u shfaq në kinematë e Shteteve të Bashkuara të Amerikës.
21 dhjetor 1963– Grekoqipriotët e armatosur filluan sulmet kundër turqve të Qipros, ngjarje kjo që njihet botërisht si “Krishtlindja e Përgjakur”. Sulmet që vijuan deri më 1 janar, u morën jetën 364 turkoqipriotëve.
21 dhjetor 1988– Një avion pasagjerësh i Linjave Ajrore Panamerikane, i cili fluturonte nga Londra për në Nju-Jork, shpërtheu në ajër mbi qytezën Lockerbie të Skocisë. Aksidenti në fjalë u mori jetën 270 personave nga 21 vende të botës, përfshi këtu edhe 11 veta në tokë. Si rezultat i hetimeve disavjeçare, u zbulua se në avion ishte vendosur bombë nga një agjent i shërbimit sekret të Libisë. Administrata e Gaddafit pranoi bashkëpunimin me autoritetet britanike, të cilave u dorëzoi teknikun e avionit dhe agjentin sekret libian, të cilët kishin vendosur bombën. Gaddafi pohoi se vendi i tij kishte përgjegjësi në këtë sulm terrorist, por mohoi implikimin e tij personal në këtë ngjarje. Qeveria libiane u pagoi miliarda dollarë dëmshpërblime familjeve të viktimave.
21 dhjetor 2017– Projektrezoluta e hartuar me nismën e Turqisë kundër vendimit të Presidentit të Shteteve të Bashkuara të Amerikës, Donald Trump, për të njohur Jerusalemin si kryeqytet të Izraelit dhe transferuar ambasadën amerikane nga Tel-Avivi në Qytetin e Shenjtë, u miratua në Asamblenë e Përgjithshme të Kombeve të Bashkuara me 128 vota “pro” dhe 9 “kundër” pavarësisht të gjitha përpjekjeve të SHBA-së për ta penguar atë. Në votim abstenuan 35 shtete. Me këtë rezolutë, OKB-ja konfirmoi se vendimi në fjalë i Trumpit binte ndesh me të drejtën ndërkombëtare.
